Read Makhuwa-Shirima Icipo 88 Bible Online

Icipo 88 - Makhuwa-Shirima bible

Icipo 88

¹Ecipo ya anamwane a Kora. Wa muhusiha a icipo, ottharihiwaka moota woowiipa icipo oniitthaniwa mahalati leyanothi. Ecipo ya miruku ya Hemani, ngwEzerahi. Ii! Yave, Muluku onkivuluxa, ohiyu ni othana kinnakhuwela ohoolowanyu.

²Nivekelonaka niphiyeke wa Nyuwo; mwiiwe okhuwelawaka.

³Okumaaka woosareya sookacamiha ni ori mukerekhere mahiye.

⁴Kohaalikeleliwa variyari wa ankhuruwela munlittini; kiri ntoko mutthu simmalenle ikuru.

⁵Kohiikaathiwa vamoha ni anamakhwa; kiri ntoko mittembo siniitthuuwa mmahiye, mwa seiyo muhinuupuwelelaanyu niwoko soovenxiwa mmatatanimwanyu.

⁶Mookiikaathi munlittini moowiixeraxa, aani ngwiixerani mwa epiphi.

⁷Mookilemelihera isarasanyu; mitekutekusanyu sootheene sookikhuneela. Sela*

⁸Mookivenxera asinthamwenaaka ooreerela munakitatuxa ethirwaaya. Kiri ntoko namatthukiwa ohingwera otthawa.

⁹Maithwaaka aakotakota niwoko na othananaxa. Ii! Yave, khula nihuku kinnawiitthanani; wa Nyuwo kinnootheteelani matataaka.

¹⁰Khamungwoonihera sootikhinihasanyu anamakhwa. Anamakhwa khaamvenya weera yoottottopeleni. Sela*

¹¹Osivelawanyu khoonlaleiwa munihiyeni naari ororomeleyawanyu moophwatani.

¹²Sootikhinihasanyu khasinsuweliwa mmapuroni a epiphi naari mitekosanyu sa ekhaikhai mweelaponi ya ottiwalaxa.

¹³Vaheera miyo kinnookhuwelelani ekhavihero, Yave; oxeexelo mavekelowaaka annaphiya wa Nyuwo.

¹⁴Ii! Yave, munkikhoottelani ni munkihuluwelani?

¹⁵Okhuma enamwanaaka kinghooxiwa kihalaka vakhaani okhwa. Kinnahaawa soohasulasanyu ni nkinoona yooweera.

¹⁶Isarasanyu sookikhuneela ni soohasulasanyu sookiphwata.

¹⁷Mahuku ootheene seiyo sinnakirica ntoko mirupi; sinnakirukureera woomalela.

¹⁸Mookaakha asinthamwenaaka ni asinkhwaaka; epiphi ti namahoolaaka paahi.