Read Makhuwa-Shirima Icipo 90 Bible Online

Icipo 90 - Makhuwa-Shirima bible

Icipo 90

¹Nivekelo na Moisesi, mulopwana a Muluku. Yave Nyuwo ti Ntthawelonahu wa ikhapira sootheene.

²Nyaako sihinaaye okhala naari Nyuwo muhinaaye opattuxa wiirimu ni vathi, aani, okhuma ompacereroni mpaka ommaleloni Nyuwo ti Muluku.

³Munaahokoloxera atthu vantthupini mweeraka: “Muhokoleele vantthupini, atthu!”

⁴Vekhaikhai vamaithoniwanyu iyaakha macira muloko sinkhala ntoko nihuku nimoha nivinre, ntoko ihuhu sikina sa ohiyu.

⁵Munaavenxa atthu mookonani. Oxeexelo ankhala ntoko malaxi amphuwa —

⁶ammela ni amphuwa oxeexelo, vaheera oxekuwa annyaala, enuuma.

⁷Ninghisiwa ni isarasanyu ni nnoopopihiwa ni onyoonyiwawanyu.

⁸Moosuwela sootakhalasahu ni sootthekasahu sa muxiirini munnoona ngwaarani wa okhalawanyu.

⁹Mahukwaahu ootheene amvira musaranimwanyu; iyaakhasahu sinlakaseya woowaakuveya.

¹⁰Iyaakha sa okumaahu ti miloko mithannamiili — apaale miloko mithannamiraru wa yaale ari salaama. Wa soothesene, iyakhasene seiyo soosareya sookacamiha ni othanana; simvira woowaakuveya ni hiyo nimmweera olakaseya.

¹¹Taani asuwenle ikuru sa isarasanyu? Vano onyoonyiwawanyu ti otokotoko ntoko woopihawanyu mumphwanelaanyu.

¹²Munuupuxere waakuva omala wa mahukwaahu weera mirimasahu siphwanye miruku.

¹³Ii! Yave, muniwehe! Mpaka yaakhani eneeraaya ekhale hiiho? Mwaamorele ikharari arumeiyaanyu.

¹⁴Munihakalalihe mooxeexeloni ni osivelawanyu woohimala weera niipe ni ohakalalaxa mahukwaahu ootheene.

¹⁵Munihakalalihe mmahukuni a onihasulawanyu; wa iyaakha nihaawanxaahu.

¹⁶Mitekosanyu soonihereye vamaithoni wa arumeiyaanyu ni waarawanyu wa anamwanaaya.

¹⁷Oreera murima wa Yave Mulukwaahu okhale ni hiyo; mulipihe miteko sa matataahu, aani, mulipihe soopakiwa sa matataahu!