Read Makhuwa-Shirima Icipo 92 Bible Online

Icipo 92 - Makhuwa-Shirima bible

Icipo 92

¹Ecipo wa nihuku na eSaabadu. Ti wooreera omuttottopela Yave ni wiipela Nsinananyu, Muluku a Musulusulu;

²olaleiya osivelawanyu woohiceendyeya ni ororomeleyawanyu ohiyu,

³ni oruma wa ekaruma ya ifiiyu muloko ni oratta wa makita.

⁴Vano Nyuwo Yave munkihakalaliha ni mitekosanyu; kiniipa ni ohakalala niwoko na soopakiwa sa matataanyu.

⁵Ii! Yave, sitokotoko ti mitekosanyu; sootikhiniheya ti soowuupuwelasanyu!

⁶Mulopwana oohikhalano miruku khaniiwexexa; mulolo khanoona

⁷weera naari atakhali ephuwaka ntoko malaxi ni atthu oonanara ekhalaka nnene, anoophwatiwa woomalela.

⁸Vaheera Nyuwo, Yave, ti oovuwihiwa wa mahuku ootheene.

⁹Vekhaikhai Yave, amwiittanaanyu ootheene anoophwatiwa; atakhali ootheene anoomwaramwaxiwa.

¹⁰Mohaandyeerera ikurusaka ntoko sa inari; koottikittheliwa ni makhura manyowani.

¹¹Maithwaaka yaahoona owiniwa wa amwiittanaaka; maaruwaaka yaahiiwa wiixinlela wa yaale yaatthuna okipaka yoonanara.

¹²Atthu oororomeleya anoottuva ntoko nivare; animunnuwa ntoko esedari* ya oLibanu

¹³ephatteiwe Mpaani mwa Yave; awosa anoottuva mmapuwani mwa Mulukwaahu.

¹⁴Naari ngwuuluvalani, nlelo animwiima; nlelo anoopwaherera oolipeene ereene akithi,

¹⁵elaleiyaka: “Yave ti a ekhaikhai; Owo ti Mwalaaka ni kheewoworu yoonanara mwa Yoowo.”