Read Makhuwa-Shirima Icipo 94 Bible Online

Icipo 94 - Makhuwa-Shirima bible

Icipo 94

¹Ii! Yave, Muluku Nakukuttula; Ii! Muluku Nakukuttula — mwaare!

²Mvenye, Mphuki a elapo ya vathi; mwaalivele oowiixoona yeeyo amphwanelaaya.

³Mpaka yaakhani, Yave; mpaka yaakhani atakhali anghakalalaaya?

⁴Awosa anuuluma masu oowiixoona; atakhali ootheene ti oosareya wiikuxerera.

⁵Awosa aahonona mulokwaanyu Yave; awosa anghasula yoohiyeraanyu.

⁶Angwiiva asinaamukhweli ni anamarwa; mpaka angwiiva akhwaasuni,

⁷nlelo aneera: “Yave khannoona; Muluku a Yakobe khansuwela etthu.”

⁸Mwiiwexexe nyuwosa oohikhalano miruku; alolo nyuwo, mmwiwere wiiwexexa yaakhani?

⁹Apaale Yoole opattunxe naaru khaniiwa? Apaale Yoole opanke niitho khanoona?

¹⁰Apaale Yoole onlaka miloko khanttaruxa? Yoole onaaxuttiha atthu khankhalano miruku?

¹¹Yave oosuwela soowuupuwela sa atthu; oosuwela weera ti sa siiyo.

¹²Ii! Yave, ooreelihiwa ti mulopwana Nyuwo munimulakaanyu; yoole Nyuwo munimuxuttihaanyu Nlamulonanyu.

¹³Munimvaha wiitthuuwa mmahukuni mwa makacamiho vaheera wa atakhali ninthipeya nlitti.

¹⁴Vano Yave khahiya mulokwaawe; kharwa athaama yoohiyeraawe.

¹⁵Nthorihelo nnoohokoleelatho mweekhaikhaiyini ni oororomeleya ootheene anootthara yeeyo.

¹⁶Taani anaawanane atakhali akeerelaka Miyo? Taani anaakhale mpattaaka aawananaka anamananariha?

¹⁷Yave ahaakikhavihenre, saano kikhanleene moomaalani mwa okhwa.

¹⁸Miyo kaaheera: “Inaawosaka sihanle oserenguwa,” osivelawanyu woororomeleya, Yave, wookilipiha.

¹⁹Kaasareyaaka makacamiho, opepesawanyu wannahakalaliha okumaaka.

²⁰Khoongwereya weera ehice ya emwene yoonanara yiiwanane ni Nyuwo — ehiceene yeele enruuhela ohiroromeleya niwoko na ikanosaya.

²¹Awosa amvaanelela okumi wa oororomeleya ni anaathorihela okhwa oohinthowa.

²²Vaheera Yave ti Nipuronaka noolipaxa ni Mulukwaaka ti Mwala kintthawelaakamo.

²³Owo onimwaamoroxela sootthekasaya ni onimwaaphwata niwoko na sootakhalasaya; Yave Mulukwaahu onimwaahonona.