Read Makhuwa-Shirima Icipo 99 Bible Online

Icipo 99 - Makhuwa-Shirima bible

Icipo 99

¹Yave onlamula — miloko sithukumele; Owo onkilaathi vahiceniwawe ya emwene variyari wa akerubini* — elapo etetereyeke!

²Yave ti Mutokweenexa oSiyoni; Owo ti oovuwihiwa opwaha miloko sootheene.

³Seiyo sittottopeleke Nsinananyu ntokotoko ni noowooveya nri nootteela.

⁴Mwene ti a ikuru — Owo onsivela ekhaikhai. Mookhaliha meerelo a ekhaikhai; moopaka oYakobe yeeyo eri yoowookoleleya ni yoororomeleya.

⁵Mumvuwihe Yave Mulukwaahu ni mukokhorele vathi wa ehicaawe ya emwene; Owo ti Ootteela.

⁶Moisesi ni Aharoni yaalikeleliwa mpatta wa asaserdotaawe; Samuweli aari mpatta wa yaale yiitthana Nsinanawe; awosa yannamwiitthana Yave ni Owo annawaakhula.

⁷Owo aahuuluma ni yaawo munrimbuni na nihutte; awosa yiiwelela ikano ni malamulo Owo aavaahaawe.

⁸Ii! Yave, Mulukwaahu, Nyuwo mwaawaakhula; wa aYixrayeli mwaari Muluku onlevelela mwaamwaattaruxelaru sootthekasaya.

⁹Mumvuwihe Yave Mulukwaahu ni mulape vamwaakwaawe wootteela, niwoko Yave Mulukwaahu ti Ootteela.