Read Makhuwa-Shirima Masu a Miruku 11 Bible Online

Masu a Miruku 11 - Makhuwa-Shirima bible

Masu a Miruku 11

¹Yave onthanya miringo soohiroromeleya, vaheera miringo sa ekhaikhai sinnamuhakalaliha.

²Waarwaaka wiixoona, emphiyatho erisa, vaheera miruku siri ni oowiiyeviha.

³Okwanela wa oororomeleya onnaweettiha, vaheera ohikwanakwana wa oohiroromeleya onimwaaphwata.

⁴Mihakhu khasimvareleya muteko munihukuni na isara sa oMuluku, vaheera wookoleleya ontapuxa mookhwaani.

⁵Wookoleleya wa oororomeleya onnaathatawalihera ephiro, vaheera mutthu oonanara murima ommora niwoko na yoonanaraawe.

⁶Ekhaikhai ya oororomeleya ennaatapuxa, vaheera soohaawela sa oohiroromeleya sinnaatthuka.

⁷Aakhwaaka mutakhali, owehererawawe onoolakaseya; sootheene aawehereraawe mukurunimwawe khasimphureleya etthu.

⁸Oororomeleya onoopowa mmakacamihoni, ni awo anthaamiheriwa wa mutakhali.

⁹Mutakhali ontthuna omphwata mukhwaawe ni eyano, vaheera oororomeleya onootapuxiwa mmirukuni.

¹⁰Oororomeleya saaweettelaka nnene, esidade ennatthapa; atakhali yaariheyaka, wookhala wiipa wa ohakalala.

¹¹Mmareelihoni mwa oororomeleya esidade enoovuwihiwa, vaheera ni eyano ya atakhali enoophwatiwa.

¹²Mulolo ongwuulumela soonanara akhwaawe, vaheera mutthu a akhili onsuwela wiimaaliha.

¹³Namuulumaxa onthupulula exiiri, vaheera oophwanela ororomeliwa onsunga exiiri.

¹⁴Ohinkhalaayawo olaka wooreera elapo kheeneetta nnene, vaheera wookhala oneetteleya nnene ankhalaayawo anamalaka ancipale.

¹⁵Yoowo onimukhavihera namarwa oolinghe, onoohaawa, vaheera yoowo onkhootta opaka yeeyo ori oolipeene.

¹⁶Muthiyana a nnene omphwanya nttittimiho, vaheera asilopwana oowuuma murima antthukuruwela mihakhu.

¹⁷Yoowo onaapakela yooreera akina oniipakela muneenaawe; mutthu oowuuma murima oniiruuhela milattu.

¹⁸Mutakhali onaakhela nlivo noolokottheya, vaheera yoowo onaala moota woowookoleleya onghepha ntthuvelo noororomeleya.

¹⁹Yoowo ompwaherera moororomeleyani onookhala ni okumi, vaheera yoowo onaasa opaka yoonanara ontthimakela wookhwaani.

²⁰Yave onaathanya atthu a murima woonanara, vaheera yaawo a mweettelo woororomeleya annimuhakalaliha.

²¹Musuwele nnene weera atakhali kheekhala woohittaruxiwa, vaheera oororomeleya anootapuxiwa.

²²Ntoko munela a eyuuma yoorikaxa munnumbini wa ekuluwe, ti hiihotho muthiyana ooreera oohikhalano akhili.

²³Soohaawela sa oororomeleya sinnawineleya; ommaleloni wa oweherera wa atakhali ti nttaruxo.

²⁴Yoowo anaavahe ni murima wootheene, onimwaandyeerera mihakhusawe; yoowo onlipano mmatatani ni yeeyo eeraawe avahe, ommorela moohaawani.

²⁵Mutthu a murima wooreera sinoomweettela nnene; yoowo onaakhavihera oovoliwa ntthona onookhaviheriwatho.

²⁶Muloko onimulapha yoole oniipithiha etrigu, vaheera mareeliho animurweela yoole ori oolikaneene othumiha.

²⁷Yoowo onaasaasa mpuha onoophwanya murima wooreera; vaheera yoonanara enimurowela yoowo onaasa.

²⁸Vekhaikhai yoowo onroromela mihakhusawe onoomora, vaheera oororomeleya anoophuwa ntoko nikukhu noopombaxa.

²⁹Yoohiyeriwa wa yoowo ontannyera milattu emusaawe eniikhale epheyo paahi; mulolo anaakhale murumeiyi a musuweli.

³⁰Yoowiima ya yoororomeleya ti mwiri wa okumi, ni yoowo onaarukunxiha murima akina ti musuweli.

³¹Oororomeleya yaakhela mweelaponi nttaruxo amphwanelaaya, wootepaxa mutakhali ni namattheka!