Read Makhuwa-Shirima Masu a Miruku 15 Bible Online

Masu a Miruku 15 - Makhuwa-Shirima bible

Masu a Miruku 15

¹Yoowaakhula yoomaaleleya enghuluxa onyoonyiwa, vaheera masu ookwitula antannya isara.

²Nlumi na asuweli nintannyera ohaawela esuwelo, vaheera eyano ya alolo engyeeha ololo.

³Maitho a Yave ari mipatta sootheene, yaawehaka ooreera ni oonanara murima.

⁴Wuuluma woosiveleya ti mwiri wa okumi, vaheera wuuluma woolokottha onttikittha munepa.

⁵Mulolo khampwatthela olaka wa atithawe, vaheera yoowo oniiwelela olaka wa atithawe onoonihera miruku.

⁶Empa ya oororomeleya sookhalamo mihakhu sitokotoko, vaheera ewinelo ya atakhali sinaaruuhela milattu sitokotoko.

⁷Masu a asuweli ammwaramwaxa esuwelo; vaheera khoohiyono hiiho murima wa alolo.

⁸Yave onthanya sooveleela sa atakhali, vaheera nivekelo na oororomeleya ninnamusiveliha.

⁹Yave onthanya iphiro sa atakhali, vaheera onimusivela yoowo onaasaasa ekhaikhai.

¹⁰Wookhala olakiwa woolipaxa wa yoowo onghiya ephiro ya ekhaikhai; yoowo ohinoonelamo ohiihiwa onimookhwa.

¹¹Nihiye ni ophwata soohuleya ohoolo wa Yave; wootepaxa mirima sa atthu!

¹²Namatthebwa khanimutthuna yoowo ommookolela, hata khanaasaasa ekhavihero ya musuweli.

¹³Ohakalala wa murima onooneya owiitho, vaheera murima woothanana onttikittha munepa.

¹⁴Murima onsuwela iseru onaasaasa esuwelo, vaheera eyano ya alolo eniiciha ololo.

¹⁵Mahuku ootheene a namahooxiwa ti ooripiha murima, vaheera murima wootteeliwa ompwaherera okhala woohakalaleene.

¹⁶Fataari okhalano vakhaani omoovaka Yave, ohikhanle okhalano mihakhu sincipale mootthukuruwani.

¹⁷Fataari oca mapoonda oraayawo osivela, ohikhanle emombe yooneneva oreenewo othanyana.

¹⁸Noowali onnatannyera owanawana, vaheera oovilela ommaliha minyakunyaku.

¹⁹Ephiro ya nooreesi ti yoosareya nyiiwa, vaheera ephiro ya oororomeleya ti musewe woothatawala.

²⁰Mwaana musuweli onaahakalaliha atithawe, vaheera mulolo onaanyoosa amayawe.

²¹Ololo onimuhakalaliha oohikhalano iseru, vaheera mutthu oowiiwexexa oneetta ngwookoleleyani.

²²Soovaanela khasineetta nnene niwoko na ohilakiwa wooreera, vaheera sineetta nnene yakhala anamalaka ancipale.

²³Waakhula yeeyoweene onimuhakalaliha mutthu; ni moota onreeraaya olakiwa mweehuhuni yootthuneya!

²⁴Ephiro ya okumi enimurongha osulu yoowo orino miruku weera owo ahikhuruwele munihiyeni.

²⁵Yave omphwata empa ya namwiixoona, vaheera onaakiha nyiinano sa etthoko ya naamukhweli.

²⁶Yave onthanya soowuupuwela sa oonanara murima, vaheera animusiveliha masu anghima woohikhala soonanara.

²⁷Namilili onghonona emusaawe, vaheera yoowo onthanya makhwankwa onookhala ni okumi.

²⁸Oororomeleya onuupuwela nnene ahinaawe waakhula, vaheera iyano sa atakhali simvuuva soonanara.

²⁹Yave ori ottai wa atakhali, vaheera oniiwa nivekelo na oororomeleya.

³⁰Oweha wooreera onghakalaliha murima, ni ihaali sooreera sinlipiha makhuva.

³¹Yoowo oniiwa ohiiha wookhavihera, onookhalano nipuronawe eriyari ya asuweli.

³²Yoowo onkhootta olakiwa oniinyoosa muneenaawe, vaheera yoowo oniiwa ohiihiwa ongwina wiiwexexa.

³³Omoova Yave onxuttiha miruku, ni ottittimiheya ontthara wiiyeviha.