Read Makhuwa-Shirima Masu a Miruku 16 Bible Online

Masu a Miruku 16 - Makhuwa-Shirima bible

Masu a Miruku 16

¹Soovaanela sa murima ti sa mutthu, vaheera wa Yave enrweela yoowaakhula ya vanlumini.

²Iphiro sootheene sa mutthu sinimukhalela ntoko sooreera, vaheera Yave omphima munepa.

³Muntteelihere Yave sootheene mumpakaanyu, ni soovaanelasanyu sinooweettelani nnenesene.

⁴Yave ompakela sootheene mwa yeeyo onuupuwelelaawe; mpaka atakhali wa nihuku na nttaruxo.

⁵Yave onaathanya oowiixoona vamurimani. Woohihovela anoottaruxiwa.

⁶Moosivelani ni moororomeleyani elevelelo ya soottheka yooweriwa; moomoovani Yave mutthu onsemba yoonanara.

⁷Iphiro sa mutthu saamusivelaka Yave, Owo ompakiha weera mpaka amwiittanaawe ekhale mmuretteleni ni yoowo.

⁸Fataari okhalano vakhaani moororomeleyani ohikhanle okhalano sincipale moota woohiroromeleya.

⁹Mmurimanimwawe mutthu omvaanela ephirowaawe, vaheera Yave onlamula malipaawe.

¹⁰Iyano sa mwene sinuuluma soolakela soolipaxa; owo ahithoriheke moota woohikhala ekhaikhai.

¹¹Miringo ni miphimo soororomeleya sinrweela wa Yave; miringo sootheene sa munrupani simpakiwa ni Yoowo.

¹²Mamwene anthanya mapakelo oonanara, woonaka weera ehice ya emwene enkhalihiwa mweekhaikhaiyini.

¹³Mwene sinimusiveliha iyano soororomeleya, ni ommoonelamo mutthu onuuluma ekhaikhai.

¹⁴Isara sa mwene ti namutthenga a okhwa, vaheera mutthu a miruku onookurunuxa isarasene seiyo.

¹⁵Ohakalala wa ekhove ya mwene ontaphulela okumi; oreerawawe murima onlikana ni nihutte na epula mutthulo.

¹⁶Fataari okhalano miruku ohikhanle eyuuma yoorikaxa! Fataari okhalano mwiiwexexo ohikhanle eparatha*.

¹⁷Ephiro ya oororomeleya ensemba yoonanara; yoowo onkosoopa ephirowaawe onuurela okumaawe.

¹⁸Ophwatiwa ontthara wiixoona; omora ontthara wiikuxerera.

¹⁹Fataari okhalano okumi woowiiyeviha eriyari ya oohooxiwa, ohikhanle okawana soohuhula ni oowiixoona.

²⁰Yoowo ori ni miruku sinoomweettela nnene, ni ooreelihiwa ti yoole onimuroromela Yave.

²¹Yoowo orino murima wa miruku oniitthaniwa naseru; yoowo onuuluma masu oosiveleya, onoowera oviriyela.

²²Wiiwexexa ti naattuuttu a okumi wa yaale arino, vaheera ololo onaaruuhela nttaruxo alolo.

²³Murima wa musuweli onxuttiha eyanowaawe, ni iyanosawe sinaandyeera mahusiho.

²⁴Masu oosiveleya ari ntoko macerephe a oravo, ti oocoocowa wa okumi ni anruuhela olama makhuva.

²⁵Yookhala ephiro enkhala ntoko yooreera wa mutthu, vaheera ommaleloniwaya enrongha wookhwaani.

²⁶Etala emmooperera yoowo ovara muteko, ovoliwawawe etala onnimunyesereriha.

²⁷Mutthu oohuupuwela nnene ompaka soonanara; maswaawe ti mooro woolaliha.

²⁸Mutthu ooriheya ontannyera minyakunyaku ni yoowo ommwaraxa soowootha onaasusiha asinthamwene ooreera.

²⁹Namapuhera onimutannyera mukhwaawe amuronghaka ephiro yoohiloka.

³⁰Yoowo omphuta maitho omvaanela yoonanara, yoowo onlumanyiha iyano ontannyera sootakhala.

³¹Ipwi ti ecireemba yoowaara ni eyo emphwanyiwa wakhala mookumini woororomeleya.

³²Fataari mutthu oovilela ohikhanle nakhotto; fataari yoowo oniisuumaaliha ohikhanle yoowo ongwina esidade.

³³Eparakha emvonyeriwa mutakhwini, vaheera olakela onrweela wa Yave.