Read Makhuwa-Shirima Masu a Miruku 18 Bible Online

Masu a Miruku 18 - Makhuwa-Shirima bible

Masu a Miruku 18

¹Mweetta meekha ontthara murimaawe paahi, ni owo onkhootta iseru sooreera.

²Mulolo khanghaawelaru wiiwexexa, mene onghakalalela soowuupuwelasawe paahi.

³Ohoonela onrwa vamoha ni sootakhala, ni overula onrwa vamoha ni wuuliha muru.

⁴Masu a mutthu ti maahi oowiixera, vaheera naattuuttu a miruku ti nxaapwa ninsarasara.

⁵Khoonreera waakhalela mpatta atakhali ngwiiyeraka oororomeleya ekhaikhaiyaaya.

⁶Masu a mulolo antannyera ococopolana, ni otthekulawawe onlattula owaxuliwa.

⁷Otthekula wa mulolo ti omorawawe, ni iyanosawe ti muraakho wa okumaawe.

⁸Masu a nawunawu ari ntoko icikwaasula sooreeraxa; simphiya mpaka mpuwa mwa mutthu.

⁹Yoowo onkhalela oreesi omutekoniwawe ti munna a yoole onnanariha.

¹⁰Nsina na Yave ti Nipuro Noolipaxa nootthawelamo; oororomeleya antthimakela weiwo, enakhala oolipeene.

¹¹Esidade yoolipihiwa ti mihakhu sa apuhi, awosa anuupuwela weera ti exiri ehingwereya owela.

¹²Ehinaaye omora murima wa mutthu onimwiihelanamo, vaheera nttittimiho nintthara wiiyeviha.

¹³Yoowo onaakhula ahinaaye wiiwa ompaka soololo, uulihiheyaka muru.

¹⁴Munepa wa mutthu onkhavihera murettani, vaheera taani anaavilele munepa woottikittheya?

¹⁵Murima wa yoowo orino iseru omphwanya esuwelo; maaru a asuweli annaasa yeeyo.

¹⁶Yoovaha enimuhelela ephiro yoole omvaha ni enimurongha vamaithoni wa asitokweene.

¹⁷Ompacera woonihera mulattwaawe onkhala ntoko khanono nthowa, mpaka aneeraawe awe mukina, amukohakohaka.

¹⁸Waasaasera mookohakohani ommaliha minyakunyaku ni onlakela mulattu eriyari ya oowera.

¹⁹Ti woorika ongwina munna ooveihiwa opwaha okuxa esidade yoolipihiwa, ni minyakunyaku sinkhala ntoko masele ookokotteliwa esidade.

²⁰Mutthu onsariha nipwiipwi ni yoowiima ya eyanowaawe; ni sinimuhakalaliha soopaka sa eyano.

²¹Nlumi nrino ikuru soolamulelano okumi ni okhwa; yaawo onaasivela ovarela muteko animooca yoowiima ya eyanowaaya.

²²Yoowo onthela omphwanya etthu yooreera; ohaakhela mareeliho a Yave.

²³Oohaawa ondyoonttelela ikharari, vaheera namapuha onaakhula ni oxilili.

²⁴Yoowo orino asinthamwene ancipale enoowereya omalela woophwatiwani, vaheera ookhalatho nthamwene a vamurimani waapwaha axunna.