Read Makhuwa-Shirima Masu a Miruku 2 Bible Online

Masu a Miruku 2 - Makhuwa-Shirima bible

Masu a Miruku 2

¹Mwanaka, weyo waakhulela maswaaka, onathokorora vamurimani malamulowaaka;

²wawiriyana miruku ni wahuleya murimaawo weera wiiwexexe;

³ni wakhuwelela esuwelo ni wiitthanela wiiwexexa;

⁴waasaasa miruku ntoko enaasiwaaya eparatha*, ni watholathola ntoko onaaseriwaaya muhakhu woovithiwa,

⁵vano weyo onimwiiwexexa ti heeni omoova Yave ni onoophwanya esuwelo ya Muluku.

⁶Vanonto ti Yave omvaha miruku; mmwaanomwawe enkhuma esuwelo ni wiiwexexa.

⁷Owo onimusungera akhili yoowo ori oororomeleya; Owo ti exikudu* emmwaakiha yoowo ori oowookoleleya,

⁸niwoko onthokorora ephiro ya oowookoleleya ni onkosoopa musewe wa oororomeleyaawe.

⁹Vano nyuwo munoosuwela yeeyo eri ya ekhaikhai, yoowookoleleya ni ya nnenesene, ni munooxuttera iphiro sooreerela.

¹⁰Vano miruku sinoovolowa vamurimaniwanyu, ni esuwelo enookhala yoosiveliha okumaanyu.

¹¹Olaka wooreerela onimoothokororani, ni wiiwexexa onimookhaviherani.

¹²Miruku sinimootapuxani mphironi mwa oonanara murima, mwa atthu a masu ooriheya,

¹³anghiya iphiro soowookoleleya weera ekuxere iphiro sa mpiphini,

¹⁴anghaawela opaka yoonanara, antthapela yoonanara ya ootakhala.

¹⁵Awosa anneetta mphironi sookhoromana, aani mphironi yoohapuxa.

¹⁶Miruku iyo sinoomutapuxatho mwa muthiyana ooraruwa, mwa oonanarihiwa onlokottha ni maswaawe,

¹⁷mwa yoowo omuhiyale yoole aari mukhwaawe okhuma emiravowaawe, ahipwatthaka wiiraana opankaawe ohoolo wa Muluku.

¹⁸Empa ya muthiyana ooraruwa enrongha wookhwaani, ni iphirosawe simphiyera mmuntuusini wa okhwa.

¹⁹Yaawo ammwaasaasa muthiyana owo kheehokolowatho, kheehokoleela ophwanya iphiro sa okumi.

²⁰Miruku sinooweettihani mphironi sa atthu a nnene ni woopwahererihani mphironi mwa oororomeleya.

²¹Vanonto oororomeleya anoomaka mulaponi, ni ookwanela anoopwahereramo;

²²vaheera atakhali anoomalamalihiwa mulaponi, ni mmo oohiroromeleya anoovenxiwamo.