Read Makhuwa-Shirima Masu a Miruku 20 Bible Online

Masu a Miruku 20 - Makhuwa-Shirima bible

Masu a Miruku 20

¹Eviinyu enimutatuxa mutthu oowiikuxerera; soowura soohapala sinimutannyera onyakulihana; oniixinnyerera mwa seiyo khakhala musuweli.

²Isara sa mwene sinlikana ni murika wa mwatto; yoowo onimutannya onleva okumaawe.

³Ti nttittimiho nimmaliha minyakunyaku, vaheera alolo ootheene amvarexexa seiyo.

⁴Nooreesi khanlima mweehuhuni ya olima; vano mweehuhuni ya ohepha onimwaasaasa, mene khamphwanyaru etthu.

⁵Soowuupuwela sa mutthu siri ntoko mmaahini moowiixa, vaheera mutthu orino iseru sooreerela onoowera orikawo.

⁶Ancipale aniixeerela asinthamwene oopwaneya, vaheera taani anaawere omphwanya mutthu oororomeleya?

⁷Mutthu oororomeleya onkhalano okumi woororomeleya; oorelihiwa anamwanaawe!

⁸Mwene aakilaathelaka ehice ya wuuluma milattu, omveera ni maithwaawe soonanara sootheene.

⁹Taani aneere: “Koorapiha murima; kootaphuwa mwa yootthekaaka?”

¹⁰Ovarela muteko miphimo ni miringo soolokottha ti itthu Yave onthanyaawe.

¹¹Mpaka mwaana onsuweliwa ni ipakelosawe — mweettelowaawe onimoonihera owo akhala oowookoleleya ni oororomeleya.

¹²Maaru aniiwa ni maitho anoona apakiwe ni Yave.

¹³Muhisivele ikhove, niwoko mwasivela munoohaawa; mvenye mukhoveni ni munookhalano yooca mpaka ohala.

¹⁴“Muhirikihe! Muhirikihe!” oneera namathuma, vaheera aapwahaka, oniittikhano yeeyo othummaawe.

¹⁵Yookhala eyuuma yoorikaxa ni rubi* sincipale, mene iyano singhimahima esuwelo ti soothowathowa.

¹⁶Mukuxe mukaandyo wa yoowo onimukhavihera namarwa oolinge, ni muthokorore yoowo, owo akhala namaroromeliha a muthiyana mmalapo.

¹⁷Yooca yoowiiyiwa enkhala ntoko yoosiva, vaheera vahoolowaya emmalela ntoko muhaava mmwaano.

¹⁸Soolaka ti sootthuneya wa yoole ontthuna opaka soovaanela, ni yoowo onrowa okhottoni ontthuneya oleeliheriwa.

¹⁹Nawunawu oneetteetta athupululaka ixiiri; tivawo munsembe yoowo onuulumaxa.

²⁰Yoowo onaalapha atithawe ni amayawe onookhwela mpiphini mooriipihana.

²¹Yoohiyeriwa emphwanyiwa woowaakuveya ompacereroni, ommaleloni kheereelihiwa.

²²Muheere: “Miyo kinoomuliviha mwa yoonanara okipankaawe!” Mungweherere Yave, ni Owo onimoowinihani.

²³Yave onthanya miringo soohikwanakwana, ni miphimo soolokottha khasinimusiveliha.

²⁴Malipa a mutthu anghooleliwa ni Yave. Anaawere hai mukina wiiwexexa ephirowaawe?

²⁵Ti muraakho otteelihera etthu woowaakuveya, ni otthokelela paahi vahoolo wa ororomeliha.

²⁶Mwene musuweli onaasusiha atakhali, ni onaaphita ni nreko nooveerelano.

²⁷Munepa wa mutthu ori ntoko yoomwaleela Yave omvarelaawe muteko weera etholatholeke khula mpatta wa okhalawawe mutthu.

²⁸Onnene ni ororomeleya onnamukhapelela mwene, moonnenenimwawe onnalipihera ehicaawe ya emwene.

²⁹Ophwaneliwa wa amiravo ori mukurunimwaya; ovuwa wa mamookwaaxa ori mupwinimwaya.

³⁰Omanakasiwa ni ovulalasa simmaliha yoonanara; owaxulasiwa ontteeliha moowiixera mwa okhalawawe.