Read Makhuwa-Shirima Masu a Miruku 22 Bible Online

Masu a Miruku 22 - Makhuwa-Shirima bible

Masu a Miruku 22

¹Fataari okhalano mweettelo wooreera ohikhanle okhalano mihakhu sincipale; ottittimiheya ni atthu akina ti wooreera opwaha eyuuma yoorikaxa hoye hoye eparatha*.

²Namapuha ni namahaawa ooweeli awo arino etthu emohamoharu ela: Ooweeli apattuxiwe ni Yave.

³Namiruku onsuwela yoowoopiha, anaasaasa wootthawelawo; oohisuwela ampwaherera, enavolowa mmahooxoni.

⁴Wiiyeviha ni omoova Yave onruuha mihakhu, nttittimiho ni okumi.

⁵Mphironi mwa mutakhali sookhalamo nyiiwa ni miraakho; yoowo ontthuna waakiha okumaawe onimwiirakameliha wa seiyo.

⁶Munxuttihe mwaana ephiro entthuneya okuxera, ni hata uuluvalaka, khahapuwaru.

⁷Namapuha onimulamula namahaawa; yoowo onkopa ti epottha ya namakopiha.

⁸Yoowo onaala ohiroromeleya onghepha yoonanara; nttaruxo na wiixoonawawe nnookwanela.

⁹Yoowo ori ookwanela onooreelihiwa niwoko onimmeela yoocaawe oohaawa.

¹⁰Oomoliwaka namatthebwa, ococopolana onoomala; simmala minyakunyaku ni oruwana.

¹¹Yoowo onsivela murima wa ekhaikhai ni maswaawe ereene oosiveliha, onookhala nthamwene a mwene.

¹²Maitho a Yave anthokorora esuwelo, vaheera Owo onooceeliha soovaanela sa oohiroromeleya.

¹³Nooreesi oneera: “Ii! Ookhala mwatto vaate!” “Kakhumela vaate kinookhwela munseweni.”

¹⁴Mutthekulelo wa muthiyana puuta ti nlitti noowiixera; yoowo aneeraawe amunyoonyeriwe Yave, onoomorelamo.

¹⁵Ololo okumanyihiwe ni murima wa mwaana, vaheera ekopo ya olakano enoomutapuxa mwa yoowo.

¹⁶Yoowo onimuhooxa oohaawa weera iipuhihe nitho yoowo onimvaha soovaha namapuha onoophiyera moohaawani.

¹⁷Ngwiriyane ni mwiiwe masu a asuweli, ni muhele vamurimani oxuttihawaka.

¹⁸Onoohakalaleya nyuwo mwathokorora vamurimani ni mwakhalana ootheene vanlumini.

¹⁹Olelo kinimooxuttihani, aani wa nyuwo weera nyuwo munroromele Yave.

²⁰Kohoolepelani soolaka ni ikano,

²¹kooxuttihakani masu oophwanela ororomela weera nyuwo mmwaakhule ni ekhaikhai yoowo oorumingheni.

²²Muhaahooxe oohaawa mwaha wa ohaawa, hata muhaahasule oothoiwa munuulummwa milattu,

²³niwoko Yave onookhala Namwaakihaaya, ni onimwaahuhula yaawo eneera yaahuhule.

²⁴Muhiithukumanyihe ni yoowo onkhala moowalini, hata muheette ni yoowo onaakuva onyoonyiwa

²⁵weera muhitakihe mweettelo owo ni muhimorele munraakhoni mwa okhwa.

²⁶Muhikhale ntoko yaale anlipa mmatatani, eroromelihaka waakhavihera yaale yoolinghe.

²⁷Mwaahikhalanne moota woolivano, munimwaakhiwa ekaamaanyu mukonenleene.

²⁸Muhiceendye ineneero sa nyiinaano sa khalayi, mwa seiye saaheliwe ni makholowaanyu.

²⁹Nyuwo mummoona mulopwana a ettottho mmutekonimwawe? Onooweliheriwa muteko wa emwene; khaavarela muteko atthu oohisuwanyeya.