Read Makhuwa-Shirima Masu a Miruku 25 Bible Online

Masu a Miruku 25 - Makhuwa-Shirima bible

Masu a Miruku 25

¹Ala ti masu a miruku sikina sa Salomoni, silempwale ni arumeiyi a Hizekiya, mwene a oYuda.

²Ti ovuwa wa Yave wiipithiha itthu, weerera woonelela itthu ti ovuwa wa mamwene.

³Mooteene yoowo erimu eraaya osuluxa ni etthaya yiixenraaya, murima wa mamwenetho khoonghotteleya.

⁴Saavenxiwaka soohalahala sa eparatha*, seiyo singhala ti wa namahana;

⁵atakhali yaavenxiwaka vamaithoni wa mwene ni ehicaawe ya emwene enoolipihiwa mweekhaikhaiyini.

⁶Muhiixunnuwihe vamaithoni wa mwene, ni muheerere okilaathi mmapuroni mwa atthu oottittimiheya.

⁷Fataari weereliwa ni mwene: “Murwe va!” ohikhanle oyevihiwa ohoolo wa mutokweene. Yeeyo moonnaanyu ni maithwaanyu

⁸muhitthimakihere omulattuni, niwoko mmwipakeni aahiwaakhulelani mukhwiinyu?

⁹Mwaasaase wuuluma mulattwaanyu ni mukhwiinyu, ni muhithupulule exiiri ya mukina,

¹⁰ohiyanawaya, yoowo aniiwe onoowuulihihani muru, ni nyuwo munimooceela ophwanyatho epilaanyu.

¹¹Masu yuulummwale mweehuhuni yootthuneya ari ntoko soowiima sa eyuuma yoorikaxa siheliweene mparathani yoohaniwa.

¹²Ohiiha onrweela mmirukuni wa yoowo onkhala oolikaneene wiiwa ori ntoko xiveeve a eyuuma yoorikaxa hoye hoye yoophwaneliha yooreeraxa.

¹³Namutthenga oororomeleya ori ntoko oriirela wa etthapwe mweehuhuni ya ohepha wa yaale animurumiha. Owo onaandyeera otteeliwa murima wa asipwiiyaawe.

¹⁴Yoole oniikuxererano soovaha ohivanghaawe ori ntoko mahutte ni epheyo ehikhalanaka epula.

¹⁵Moowehererani ni ovilela onoowereya omviriyela mutokweene, ni wuuluma moota woosiva onoowera opwexa makhuva.

¹⁶Nyuwo mwaphwanya oravo, muhicaaxeke, weera muheettiwe murima murapheyaka.

¹⁷Muhixekuraxeke vaate wa mwaattamanaanyu weera owo ahookhulumuweni, oothanyakani.

¹⁸Ntoko mwaakopo, ekatana hoye hoye muupa woowiitha ti yoole onimukhalela namoona oowootha mukhwaawe.

¹⁹Omuroromela oowiixeera mweehuhuni ya makacamiho ori ntoko niino nooposowa hoye hoye nnaawo noorakala.

²⁰Yoowo ommwiipela mutthu ni murima woothanana ori ntoko orula yoowaraawe vanihukuni nooriira, hoye hoye waamela eviinyu yoonyuunya vanikhwattani.

²¹Mwiittanaanyu avoliwa etala, mumvahe yooca; avoliwa ntthona mumvahe yoowura.

²²Mwapaka yeeyo, munoomuukelela makhala a mooro mmurumwawe, ni Yave onimootthuvelani.

²³Mooteene yoowo epheyo enrweela ottuttuwani enruuhaaya epula, hiihotho nlumi noowootha ninruuha oweha woosareya isara.

²⁴Fataari okhala vanloothoni na etarato, ohikhanle okhala ni muthiyana ooxupa.

²⁵Ntoko maahi ooriira wammilo woowuuma ti mutthenga wooreera onrweela elapo yoorakamela.

²⁶Ntoko ephattuwela yoosareya ittoko hoye hoye naattuuttu a maahi oonanara, hiihotho ti oororomeleya onimpororiha mutakhali.

²⁷Ocaaxa oravo khoonreera, naari khoonttittimiheya waasaasa nttittimihonanyu muneenaanyu.

²⁸Ntoko esidade erino ixiri sookurumuwa, ti mutthu ohingwera wiilamula.