Read Makhuwa-Shirima Masu a Miruku 26 Bible Online

Masu a Miruku 26 - Makhuwa-Shirima bible

Masu a Miruku 26

¹Ntoko etthapwe mweelimweni hoye hoye epula mweehuhuni ya ohepha, hiihotho nttittimiho khanimukhalela mulolo.

²Ntoko cirikhu omvava atthawaka, ni meenkesa omvavaxa, hiihotho nlapho noohiphwanela khaniitthuuwa.

³Ekwamba ti wa ekavalu*, eneettiheriwa ti wa buuru ni ekopo wa mmakhatani a mulolo.

⁴Muhimwaakhule mulolo moota woololo, mwapaka hiiho, nyuwo munoolikana ni yoowo.

⁵Mmwaakhule mulolo ntoko omphwanelaaya ololowaawe, ohiyanawaya, owo anuupuwele weera ti musuweli.

⁶Ntoko okwitula nnaawonanyu hoye hoye owura yoohapala ti orumiha mutthenga mmatatani mwa mulolo.

⁷Ntoko antthukaaya oohivareleya muteko imetto sa ootuthunya, hiiho ti masu a miruku mmwaano mwa mulolo.

⁸Ntoko otthukelela nluku mukwambani, ti omuttittimiha mulolo.

⁹Ntoko ephandi ya nyiiwa mmatatani mwa namawura, ti masu a miruku mmwaano mwa mulolo.

¹⁰Ntoko namuupa onaasa olatha ti omvariha muteko mulolo hoye hoye akhalaru mutthu omvira.

¹¹Ntoko mwalapwa onghokoleelaawe marapheyowaawe, ti mulolo onghokoleelaawe ololowaawe.

¹²Nyuwo mummoona mukina oniihelano onamiruku? Mulolo ookhalano oweherera ompwaha yoowo.

¹³Nooreesi oneera: “Ookhala mwatto mphironi, mwaatto ooluwaxa oniipa mmiseweni.”

¹⁴Ntoko nsele nniinainaaya nitthukeleliwaayawo, hiihotho nooreesi onrukunuwasaawe onkonaawewo.

¹⁵Nooreesi onghela ntata musasaanini, vaheera onimurikelaxa ohokoloxera mmwaano.

¹⁶Nooreesi oniihelana okhalaxa musuweli waapwaha asilopwana athanneeli anaakhula ni iseru.

¹⁷Ntoko mukina omvara maaru a akhalaru mwalapwa, ti mutthu omvolowa moonyakulihanani ohimwaattamme.

¹⁸Ntoko naanepa omvonya makhala a mooro ni nyuupa soowiiva,

¹⁹ti mutthu onimulokottha mukhwaawe anamweerela: “Miyo kaamweera otheela paahi.”

²⁰Saahikhala ikhuuni, mooro onoocipha; aahikhala nawunawu ommala onyakulihana.

²¹Makhala ti oopattihera, ni ikhuuni wa vayikho ni hiihotho nawunawu ti ootannya minyakunyaku.

²²Masu a nawunawu ari ntoko icikwaasula sooreeraxa; simphiya mpaka mpuwa mwa mutthu.

²³Ntoko yooningano ereene muyoopweni, iyano sinuuluma masu oosiva sinkhuwa murima woonanara.

²⁴Yoowo onthanya onkhuwa ni masu oosiva, vaheera vamurimaniwawe soosareya soolokottha.

²⁵Naari otthekulawawe oreene woowiisuumaaliha, muhimwaakhulele, niwoko itthu sa mwiikho ithannapiili sinsareya mmurimanimwawe.

²⁶Owo onoowera wiixeera ni wiipithiha othanyawawe, vaheera yoonanaraawe enimoonihereya mwaatthuni.

²⁷Yoowo onthipa elakasa, onoomorelamo; mukina ompirikixa nluku, nno nnoomphirikeela muneenaawe.

²⁸Nlumi noowootha nnaathanya yaawo nnaavulalihaaya ni eyano yoolokottha entannyera oheleya nthala