Read Makhuwa-Shirima Masu a Miruku 28 Bible Online

Masu a Miruku 28 - Makhuwa-Shirima bible

Masu a Miruku 28

¹Mutakhali ontthawa naari ahitthareleliwaka, vaheera oororomeleya anlipiha murima ntoko mwatto.

²Elapo yaakhalaka yoovaanya, enaakhalano ahooleli ancipale, vaheera muhooleli musuweli ni a miruku onimweettiha nnenesene elapo.

³Namahaawa onthatuwa mpuhi anaahasula oohaawa, ori ntoko ettheku yootutuxereya emphwata soophatteiwa sootheene.

⁴Yaawo anghiya nlamulo anaattapahera atakhali, vaheera aniiwelela nlamulo anaawanano yaawo.

⁵Atthu oonanara murima khaaniiwexexa ekhaikhai, vaheera ammwaasa Yave anniiwexexa nnenesene.

⁶Fataari namahaawa oneetta moota wookwanela ohikhanle namapuha mwa yoowo iphirosawe siri sootakhala.

⁷Yoowo oniiwelela nlamulo ti mwaana a miruku, vaheera mukhwaaya anamaca ongwuulihiha muru atithawe.

⁸Yoowo onaandyeerera mihakhusawe ni olivihaxa iphura, onimuthukumanyihera mukina, mwa yoowo anaakhale a nnene wa oohaawa.

⁹Mukina akhootta wiiwa nlamulo, mpaka mavekelowaawe anoothanyeya.

¹⁰Yoowo onimuhapuxera mutthu oowookoleleya mphironi yoonanara, onoomorela muneenaawe munraakhoni orengyaawe, vaheera yoowo ohiniihiyerera ahapuxiwaka, onookhalano ntthuvelo nooreera.

¹¹Namapuha oniixeerela musuweli, vaheera namahaawa orino iseru onoomphimaxa.

¹²Oororomeleya yaawinaka, onoosareya weetteleya nnene, vaheera atakhali yaalamulaka, atthu animwiipithasa.

¹³Yoowo oniipithiha sootthekasawe khasimweettela nnene, vaheera yoowo onlapa, anahiya omphwanya ikharari.

¹⁴Ooreelihiwa mutthu onkhalela nthiti omoova Yave! Vaheera yoowo onuumiha murima onoomorela mwa soonanara.

¹⁵Ntoko mwatto oniipa, ni ursu* ooluwaxa ti mutakhali onlamula muloko woothoiwa.

¹⁶Mulamuli oohikhalano iseru onaandyeerera mahasu, vaheera yaawo anthanya ewinelo yoohiroromeleya anoopwaherera olamulawaya.

¹⁷Namwiiva onghooxiwa ni nthowa onookhala namatthawatthawa mpaka okhwa; woohikhala oomukhavihera.

¹⁸Yoowo oneetta mookwanelani onookhala oolipeene, vaheera yoowo oneetta moota wooriheya, onoomora wootutuxereya.

¹⁹Yoowo onlima mmattamwawe, onooruwera, vaheera yoowo ontthara ethiru onoosareya osiwa.

²⁰Oororomeleya onooreelihaxiwa, vaheera yoowo ontthuna othadyiri woowaakuveya khakhala woohittaruxiwa.

²¹Weetta nthalu khoonreera; mpaka wa yooca vakhaani mutthu onoopaka yoonanara.

²²Namilili onaakuvela mihakhu, ni khansuwela weera ohaawa onoongweherera.

²³Yoowo onimuhiiha mukhwaawe, ommaleloniwawe onoophwanyaxa murima wooreera, ompwahaxa yoole onttapahera moolokotthani.

²⁴Yoowo ongwiiya atithawe hoye hoye amayawe eeraka: “Nkitapannye,” ti nthamwene a yoole omphwata.

²⁵Namahaawelaxa ontannyera onyakulihana, vaheera yoowo onimuroromela Yave, sinoomweettela nnene.

²⁶Yoowo oniiroromela, ti mulolo, vaheera yoowo oneettela miruku khakhanle ngwoopihani.

²⁷Yoowo onaavaha oohaawa, khathoiwaru, vaheera yoowo omputiha weera ahiwoone, onoohaawa malapho mancipale.

²⁸Atakhali yaalamulaka, muloko onimwiipitha; vaheera awosa yaalakaseyaka, oororomeleya sinooweettela nnene.