Read Makhuwa-Shirima Masu a Miruku 29 Bible Online

Masu a Miruku 29 - Makhuwa-Shirima bible

Masu a Miruku 29

¹Yoowo onnyeserera mootapanyani ahiihaxiweene, onoophwatiwa woohileeliwa ni woohimurette.

²Oororomeleya yaawinaka, muloko onoohakalala; atakhali yaalamulaka muloko onimwiipulela.

³Mutthu onsivela miruku onaahakalaliha atithawe, vaheera yoowo oneetta ni mapuuta, ommaliha mihakhusawe.

⁴Mwene oneettiha ekhaikhai, onkhaliha mmaaleleyo elapwaawe, vaheera yoowo onsivela makhwankwa animurongha woophwatiwani.

⁵Yoowo onimuttapahera mukhwaawe moolokotthani onimureela miraakho inaawosawe.

⁶Yoottheka ya mutthu oonanara murima enimvara mmuraakhonimwawe, vaheera oororomeleya onoowera wiipa ni ohakalala.

⁷Oororomeleya ampwattha soophwanela sa oohaawa, vaheera atakhali khaampwatthelaru yeeyo.

⁸Anamatthebwa anghela mutekuteku esidade, vaheera asuweli anoomaliha.

⁹Namiruku arowa onuulummwa milattu mwaha wa mulolo, khookhala murettele, niwoko mulolo onoonyoonyiwa amutthebweke.

¹⁰Namapuhera onaathanya oororomeleya ni onaasaasa omwiiva mutthu ookwanela.

¹¹Mulolo oniittha isarasawe, vaheera namiruku onimwiilamula.

¹²Mulamuli iiwelela soowootha, asitokweenaawe ootheene anookhala atakhali.

¹³Namahaawa ni namahooxa ooweeli awo arino etthu emohamoharu ela: Yave ongwooniha ootheenaawo.

¹⁴Mwene aathorihaka oohaawa ni ekhaikhai, ehicaawe ya emwene enoopwaherera yoolipeene.

¹⁵Ekopo ya ohiiha emvaha miruku, vaheera mwaana oohipwatthiwa ongwuulihiha muru amayawe.

¹⁶Atakhali saaweettelaka nnene, eneetteleyatho nnene yoottheka, vaheera oororomeleya animoona omorawaya seiyo.

¹⁷Munlake mwaninyu, ni owo onimooruuhelani murettele; onooruuhelaxa sooreera okumaanyu.

¹⁸Ohinoonihereyaayawo otthuna wa Muluku, muloko onoohapuwa; vaheera ooreelihiwa yoole oniiwelela Nlamulo!

¹⁹Epottha kheenxuttihiwa ni masu paahi, niwoko naari yiiwexexaka, kheempwatthela.

²⁰Nyuwo mummoona mukina onaakuva wuuluma? Mulolo ookhalano oweherera ompwaha yoowo.

²¹Akhala mukina onramela epotthaawe ahilakaka okhuma emiravowaaya, ommaleloni onoothanana.

²²Mutthu oonyoonyiwa ontannyera ococopolana, ni mwaana oopuhera ompaka soottheka sincipale.

²³Wiixoona wa mutthu onoomuyeviha, vaheera oowiiyeviha onookhalano nttittimiho.

²⁴Nthamwene a namwiiya onimwiithanya; owo onnyesereriwa okhalela onamoona, mene khangwera opaka.

²⁵Yoowo ommoova mutthu ommorela mmuraakhoni, vaheera yoowo onimuroromela Yave ori oolipeene.

²⁶Ancipale ammweepesa mulamuli, vaheera ekhaikhai enrweela wa Yave.

²⁷Oororomeleya anaathanya oohiroromeleya, ni atakhali anaathanya ookwanela.