Read Makhuwa-Shirima Masu a Miruku 30 Bible Online

Masu a Miruku 30 - Makhuwa-Shirima bible

Masu a Miruku 30

¹Miruku sa Aguri, mwaana mulopwana a Yaki. Owo aamulaleera Itiyeli; wa Itiyeli ni Ukali:

²Miyo ti muloloxa a atthu; nkinonoru mwiiwexexo wa mutthu.

³Nkixuttenre miruku, naari nkimusuwenle Ootteela.

⁴Taani owenle wiirimu anakhuruwa? Taani ophunte mmatatani ipheyo? Taani ohuruwenle maahi mmukaandyonimwawe? Taani okhalinghe nyiinano sa mulaponi? Nsinanawe taani ni na mwanawetho? Mukithalihere nyuwo mwaasuwenleene!

⁵Khula nsu na Muluku vekhakhai ti nootteela. Owo ti Yoowiixaakihera wa yoowo onimutthawelela.

⁶Muhaandyeerere maswaawe, ohiyanawaya, onimoohiihani awooniherakani weera nyuwo namootha.

⁷Kimvekela itthu piili weera mukivahe kihinaaye okhwa:

⁸Mukirakamelihere olokottha ni wootha; muhikivaheru ohaawa naari opuha; mukivahe paahi yooca yootthuneya.

⁹Ohiyanawaya kakhalano soowaatta, kaamookhoottani ni kaamoohiyani keeraka: “Yave taani?” Kahaawa, kaamweera wiiya, kiveihaka hiiho Nsina na Mulukwaaka.

¹⁰Muhimuulumele yoonanara murumeiyi ohoolo wa pwiiyaawe; ohiyanawaya onimoolaphani ni nyuwo munookhalano nthowa.

¹¹Aakhala anaalapha atithaya ni ahinaareeliha amayaya;

¹²yaawo aniixoona otteela, ereene nlelo oohitteela;

¹³yaawo arino maitho oowiixoona, ewehaka moota woowiikuxerera;

¹⁴atthu mwa yaawo mainowaaya ari ikatana ni ananderaaya ti nyaalo weera yaanyaanye oothoiwa a mulaponimu ni oohaawa a omutthu.

¹⁵Mututhi wookhalano anamwane asithiyana eeli. Awosa ankhuwela: “Mvahe! Mvahe!” Sookhala itthu tthaaru sihimvonaru; ixexe sihineeraru: “Wookwana!”:

¹⁶Okhwa, mwali eekupa, etthaya ehinkwaneyaru maahi, ni mooro ohineeraru: “Wookwana!”

¹⁷Maitho a yoowo onaatthebwa atithawe, ni aatthebwaka, onkhootta owiiwelela amayawe, anoozooliwa ni anakhuku a mureyareyani, ni anoonyaanyiwa ni axaana a marepo.

¹⁸Sookhala itthu tthaaru sookitikhiniha; ixexe kihingweraaka wiiwexexa:

¹⁹Makhalelowaawe xaaka wiirimu, mpurulo wa enowa vamwala, ephiro ya nikula ntokotoko mphareiyani ni ephiro ya mulopwana ni mwaamwali.

²⁰Ephiro ya puuta ti ela: Owo onca, anuukuttha owanoni, eeraka: “Nkipankeru yoonanara.”

²¹Itthu tthaaru sinteterexa etthaya; ixexe sihingwereya ovilela:

²²Epottha enthatuwa mwene, mulolo oovonaxa,

²³muthiyana ootheliwa ohinsiveliwa, ni epottha ethiyana enkuxa nipuro na muhanowaaya.

²⁴Ikhalelo ixexe sa mulaponi siri ikhaanene, hata hiiho ti sookhalanaxa miruku:

²⁵Ineneele siri soopattuxiwa soohikhalanaxa ikuru, wa soothesene, sinthokorora yoocaaya elimwe;

²⁶ipila ti soopattuxiwa soohiweraxa, wa soothesene sinkhala mmakhukuni;

²⁷misoope sihikhalanne mwene, wa soothesene, sineetta vamoha sithataanneene,

²⁸ni nimara ningwereya ovara ni matata, wa soothesene, nimphwanyaneya mmavaate mwa emwene.

²⁹Sookhala soopattuxiwa tthaaru sineetta soophwaneliwa, ixexe sineetta siinyarulaka:

³⁰Mwatto, ori ooweraxa eriyari ya axinama, ni khaawo onimutthawaawe;

³¹Muthupi oneetta wiixoonaka; napunci ni mwene ohoolo wa anakhottwaaya.

³²Nyuwo muupuwenleene ntoko mulolo ni mwiivuwihaleene, hoye hoye mwaavaanenleene yoonanara, mphute eyano ni ntata.

³³Niwoko hiiho ntoko waama mukaka ankhuma manteiga, ni hiiho ntoko opiritula ephula onkhumiha ephome, mpakatho otannyera isara sinkhumelela minyakunyaku.