Read Makhuwa-Shirima Masu a Miruku 31 Bible Online

Masu a Miruku 31 - Makhuwa-Shirima bible

Masu a Miruku 31

¹Masu a miruku sa mwene Lemuweli, moota yaamuxuttinghaaya amayawe:

²Ii! Mwanaka, mwaana mulopwana kimuyanraaka, aani kaamvekenlaaka,

³ohinanarihe ikurusawo mwaathiyanani, okhomaalawawo, ni yaale anaaphwata mamwene.

⁴Khoontthuneya wa mamwene, ii! Lemuweli; khoontthuneya wa mamwene owura eviinyu, khoontthuneya alamuli owura soohapala,

⁵weera, ewuraka, ehittiwale silamuleliwe munlamuloni, ewiiyeraka hiiho oohooxiwa soophwanelasaya.

⁶Mwaavahe yoowura yoohapala yaawo ahanle vakhaani okhwa, eviinyu yaawo ari moothananani;

⁷weera ewure ni ettiwale ohaawawaya, ni ehuupuweletho ohihakalalawaya.

⁸Mukhuwele ngweerelaka yaawo ahingwera wiixaakiha, mukhale namwaakiha a yaawo anaasa wiixeetta.

⁹Mukhuwele ni muthorihe ni ekhaikhai; mwaakihe soophwanela sa oohaawa ni oothoiwa.

¹⁰Mwaara a ethoonyero yooreera — taani anaamphwanye? Ti ootthuneyaxa opwaha rubi*.

¹¹Iyawe onnamuroromela moota wookwanela ni kheenimuhaleelaru etthu yootthuneyaxa.

¹²Owo onimpakela yooreeraru, ahimpakelakaru yoonanara, mmahukuni ootheene a okumaawe.

¹³Onthanla mapururu a ikhondoolo ni eliinyu*, anavara muteko ni matataawe ni murima wootheene.

¹⁴Owo ori ntoko makula matokotoko ankuxa miritti, aruuhaka ottaiwene sooca.

¹⁵Ohinaaye oxa owo omvenya, anaarehererela yooca ootheene a vaatewawe, anaavaha miteko arumeiyaawe asithiyana.

¹⁶Owo ongwehaweha ematta, anathuma; yeeyo ongwinelaaweno omphatteya ematta ya iwuuva*.

¹⁷Oniixinnyerera mmutekonimwawe ni murima wootheene; nyoonosawe siri soolipa ni sookhomaala.

¹⁸Ommweettiha nnenesene nakoswaawe oowineleya, ni yoomwaleelaawe kheencipharu ohiyu wootheene.

¹⁹Mmatatani omvarela mukopothi, ni ikatha omvarela yoottotthano.

²⁰Onaakhavihera oothoiwa ni onaavaha oohaawa.

²¹Khangwoova amusaawe yaakhalaka etthapwe yooriiraxa, niwoko ootheenaawo angwara ikuwo sa mwiitti.

²²Owo ompakela yoowaatala vakaamaniwawe, aniiwariha ikuwo sa eliinyu* ni sa kanka.

²³Iyawe onttittimihiwa vamulako wa esidade, onkilaathaawewo eriyari ya asitokweene a elapo.

²⁴Owo ompaka soowara sa eliinyu*, anathumiha, ni onaapakela alaamba ananakoso.

²⁵Oniiwariha ikuru ni ophwanelela; ontheya uupuwelaka sa muhoolo.

²⁶Onuuluma ni miruku ni onxuttiha ni osivela.

²⁷Onimukosoopa nakoso a vaatewawe ni khantthuniheraru oreesi.

²⁸Anamwanaawe amvenya, enamuttapahera; iyawetho onimuttapahera eeraka:

²⁹“Asithiyana ancipale ari a ethoonyero yooreera, vaheera nyuwo mohaapwahaxa.

³⁰Ekhove yoovorenghela murima ti yoolokottha, ni ophwaneliwa ti woovira; vaheera muthiyana ommoova Yave onoottapaheriwa.

³¹Owo aakhele ntthuvelo nnimphwanela ni mitekosawe sittapaheriwe vamulako wa esidade.