Read Makhuwa-Shirima Masu a Miruku 6 Bible Online

Masu a Miruku 6 - Makhuwa-Shirima bible

Masu a Miruku 6

¹Mwanaka, waareene weera woororomeliha omukhavihera mukhwaawo oolinghe musurukhu, ni waathatungweene namaroromeliha wa namarwa,

²waamorenleene munraakhoni niwoko na masu waahimmaawo, wootthukiwa ni yeeyo wuulummaawo,

³vano mwanaka, weenre omorela mmatatani mwa mukhwaawo — orowe wiiyevihe, omudyoonttelelaka mwaattamanaawo wiiwa mulattwaawo!

⁴Ohitthunihere maithwaawo okona hata ohaasase wiitthuuwa.

⁵Wiitapuxe ntoko oniitapuxaawe naahe wa namalupattha, ntoko mwaapalame ntaphani nnimphariha.

⁶Moone eneneele nyuwo ooreesi; mutthokelele iphirosanyu ni mukhale musuweli!

⁷Eyo kheenono mutokweene, hata namawehaweha, naari mulamuli,

⁸hata hiiho, enthokorora yoocaaya mweelimweni ni mweehuhuni ya ohepha enthukumanya yoocaaya.

⁹Mpaka yaakhani mpwahereraka wiixaatalela, ooreesi nyuwo? Mmuvenye yaakhani mukhovenimwanyu?

¹⁰Mulohaka ni mooseelaka ni mwiikimanyaka nyoono weera mukone nnene,

¹¹ni vano ohaawawanyu onimootutuxerani ntoko namwiiya, ni onimoorweelani othoiwa ntoko mulopwana amukunxeene kapwiitthi.

¹²Oohimuteko ni mutakhali onimwaasa weetteetta ahimaka itthu soonanara;

¹³owo onkaphila, ompurula inaawo ni ompaka ineneero ni ikatha;

¹⁴vamurimanivawe woolokottha omvaanela soonanara; mahuku ootheene ontannya minyakunyaku.

¹⁵Tivawo erisa eneeraaya emurweele wootutuxereya; onoophwatiwa woowaakuveya woohimurette.

¹⁶Sookhala itthu ithannamosa onthanyaawe Yave, itthu ithannapiili Owo ohinoonelaawe:

¹⁷Maitho oowiixoona, nlumi noowootha, matata angyeeha ephome yoohinthowa,

¹⁸murima omvaanelela soonanara, inaawo sinaakuva opaka soonanara,

¹⁹namoona oowootha ommwaraxa soowootha ni yoole ontannyera minyakunyaku eriyari ya axunna.

²⁰Mwanaka, wiiwelele malamulo a atithawo ni ohihiye mahusiho a amayawo.

²¹Otthukelele mahuku ootheene vamurimani; oware muxiko.

²²Weyo weettaka awo animoohoolela; waakonaka, animookosoopa; waavenyaka, animuuluma ni weyo,

²³niwoko nlamulo nna nri ntoko yoomwaleela, mahusiho ala ari ntoko waara, ni wooperera wa olaka ori ntoko ephiro enrongha wookumini;

²⁴iyo sinoowaakihera wa muthiyana ooraruwa, ni ottapaheriwa woonanara wa muthiyana ooraviwa.

²⁵Ohoovorenghele murima ophwaneliwawawe hata ohihapuxeye ni maweherowaawe,

²⁶niwoko puuta onimooruuhela ohaawa, vaheera muthiyana a mulopwana mukina onlupattha okumaawo xaxaxa.

²⁷Mutthu onoowera wiikaathi mooro vakakasani woohiza soowara?

²⁸Mutthu onoowera weetta vamakhalani a mooro woohiza inaawo?

²⁹Eneereya hiiho ni yoole onkonano mwaara a mukina; khaawo onimutava ahinattaruxiwa.

³⁰Namwiiya khannyoosiwa, owo iiya weera iive etala.

³¹Wa soothesene, avariwa, aliveke imaara ithannapiili yeeyo iiyalaawe, naari yeeyo emurikelaka wa sootheene orinaawe owaani.

³²Vaheera mulopwana onraruwa, khanono iseru; ootheene aneetta moota owo animwiihonona.

³³Onoohaawa ovulalasa ni wuulihiheya muru, ni oyeviheyawawe khoomala,

³⁴niwoko ehace entannya onyoonyiwa wa iyawe ni owo khammorela ikharari, iinlelaka ikukuttula

³⁵Khaakhulelaru oliviwa; soovaha sooreerela khasinimmaaliha.