Read Makhuwa-Shirima Masu a Miruku 8 Bible Online

Masu a Miruku 8 - Makhuwa-Shirima bible

Masu a Miruku 8

¹Miruku sinkhuwela; akhili ankhuwelaxa;

²muttuttuwani, muxerexere ephiro, mmathakalaano owo onimweemela;

³waansele, vamulako wa esidade, milako sa mpuwa owo onkhuwelaxa.

⁴Wa nyuwosa asilopwana, kinookhuwelelani; wa omutthu wootheene kinookhuwelelaxa.

⁵Nyuwosa oohisuwela, mphwanye miruku; ni nyuwosa alolo, mukhaleno muupuwelo wooreera.

⁶Vano mwiiwe, kookhalano itthu sintthuneya ohima; iyanosaka sinimuuluma ekhaikhai.

⁷Eyanowaaka enuuluma ekhaikhai, niwoko iyanosaka sinthanya soonanara.

⁸Maswaaka ootheene ti oororomeleya; khaniwoworu nsu noolokottha naari noohuureya.

⁹Wa yaale arino akhili, maswaaka ti oowiiwanyeya, ni oowookoleleya wa yaale arino esuwelo.

¹⁰Mukupaleele oxuttihawaka ohikhanle eparatha*, ni esuwelo ohikhanle eyuuma yoorikaxa yooreera,

¹¹niwoko miruku ti etthu yooreeraxa opwaha erubani*; kheewo mungweraanyu ohaawela enlikana ni seiyo.

¹²Miyo miruku, kinkhala vamoha ni akhili, ni kookhalano esuwelo enrweela mmuupuweloni wooreera.

¹³Omoova Yave ti othanya yoonanara; kinthanya wiixoona ni wiikuxerera, mweettelo woonanara ni wuuluma wootakhala.

¹⁴Olaka wooreerela ti wawaka; wiiwexexa ni owera ti wawaka.

¹⁵Mwa miyo mamwene anlamula, asitokweene ankhaliha ikano sa ekhaikhai;

¹⁶mwa miyotho maneethi anlamula nitho aphuki ootheene a mulaponi.

¹⁷Kinaasivela yaawo ankisivela, ni yoowo onkaasa onookiphwanya.

¹⁸Mwa miyo sookhala mihakhu ni nttittimiho, weetteleya nnene ni ekhaikhai yoolekela.

¹⁹Yoowiimaaka ti yooreerela opwaha eyuuma yoorikaxa, aani opwaha eyuuma yooreeraxa; yeeyo kimvahaaka ti yoopwaha eparatha* yooreerelaxa.

²⁰Kineetta mmuseweni mwa wookoleleya, mphironi mwa ekhaikhai,

²¹kaavahaka mihakhu yaawo ankisivela ni kisarihaka mukwartunimwaya wa mihakhu.

²²Yave okipattunxe ntoko epacerero ya soopakasawe, sihinaaye mitekosawe sa khalayixa;

²³kikhalihiwe okhuma khalayi, aani ompacereroni, ehinaaye okhala etthaya.

²⁴Kiyariwe sihikhanle iphareiya, nlelo ehinaaye okhala anaattuuttu a maahi;

²⁵Miyo kiyariwe sihinaaye okhalihiwa nyaako ni mattumuxa.

²⁶Owo eera ahinaaye opaka etthaya hata ntuphi, naari ntthupi mwa nenno opakenlaaweno elapo ya vathi.

²⁷Owo aakhalihaawe erimu, miyo kaakhalawo; aahelaawe mwiinano ephareiya,

²⁸iikaathaawe mahutte osulu ni aakhalihaawe anaattuuttu a moowiixera,

²⁹aahelaawe nyiinano sa mphareiya weera maahi ehivoleelane, aakhalihaawe nyiinano sa mathipelo a elapo.

³⁰Vano miyo kaari mukhwipimwawe ntoko namarattaawe ooweraxa. Khula nihuku kaari oosiveleyaawe ni kaahakalala woohihiyerera vamaithoniwawe.

³¹Miyo kaahakalalela elapo opattunxaawe, ni omutthu wannakihakalaliha.

³²Vano anamwanaaka, mukiiwe: Ooreelihiwa yaale aneettela iphirosaka!

³³Mwiiwe mahusihowaaka, ni munookhala asuweli. Muhinyoose.

³⁴Ooreelihiwa mulopwana onkiiwa, awehawehaka mahuku ootheene mulakwaaka, awehereraka wa milakoni sa empaaka.

³⁵Vano ootheene yaale ankiphwanya, anookhalano okumi ni anoophwanya murima wooreera wa Yave.

³⁶Vaheera yoowo onkirakamela, oniinanariha mwaneenaawe; ootheene ankithanya ansivela okhwa.