Read Makhuwa-Shirima Namalaleiya 4 Bible Online

Namalaleiya 4 - Makhuwa-Shirima bible

Namalaleiya 4

¹Kaawehatho, kinoona nihasu nootheene nneereya mulaponimu: Kaahoona maithori a oohooxiwa ni khaakhanleru oowaapembesa; olamula ti wa anamahasula, ni khawoworu oowaapembesa.

²Tivawo kiwoonenlaaka anamakhwa okhala oohakalalaxa ohikhanle yaawosa nlelo ontthuneya okhala ni okumi.

³Vanonto, fataari yoole ohiyariwe, aani yoole ohoonne yootakhala empakiwa mulaponimu, ohikhanle ooweel ale.

⁴Kohoonelela weera muteko wootheene ni simpakiwa sootheene sa mutthu siri niwoko na omukhalela nrima mwaattamanaawe. Mene eyotho kheentaphulelaru etthu, ti woomola epheyo paahi.

⁵Mulolo oniikhuraana aphwataka okumi.

⁶Fataari okhalano etthu muntatani nimoha ni moota woomaaleleya, ohikhanle mmatatani meeli ophwanyaka ni wiiminyaalelaxa ni woomola epheyo.

⁷Kohoonelelatho mulattu mukina mulaponimu, mwa yoowo ori wa siiyo.

⁸Aakhala mulopwana mmoha aari meekhaaweru paahi; khaarinoru mwaana naari munneiye. Aavara muteko woohihiyerera! Wa soothesene, maithwaawe khayaahakalalela mitekosawe. Owo oniikoha: Kimvarelaxa heeni muteko ni kinixiimanela heeni itthu soosiveliha? Eyo kheentaphulelaru etthu; owo ori mulattu woothananiheya.

⁹Fataari weetta eeli ohikhanle okhala meekhaawo, niwoko ntthuvelo ntokweene, ti muteko omvariwa atthu eeli.

¹⁰Amora mmoha, nthamwene onoomukhavihera weemela. Vaheera ii! Mulopwana owo ommora ahinakhalano oomvenxa.

¹¹Hiihotho, atthu eeli yakona vamoha anoovahana nttukuttha. Vanonto, moota heeni mutthu mmoha aneeraawe iivahe nttukuttha?

¹²Mutthu mmoha onoowineya, vaheera atthu eeli anoowera wiixaakiha. Mukhoyi orithingwe itika tthaaru ti woorika opaseya.

¹³Fataari mmiravo oohaawa ohikhanle mwene oowuuluvala ni mulolo ohinaakhulela ohiihiwa.

¹⁴Mmiravo wookhala wookhumaka mukaliposo anakilaathela ehice ya emwene, orooyariwaru oohaaweene moomweneni mwa mwene.

¹⁵Kaahoona weera ootheene ankhala mulaponi yaamutthara mmiravo aari namarandela a mwene.

¹⁶Waatta wa yaale yaamutthara yoowo, waari woohaalikeleya. Wa soothesene, ekhapira yaattharelana khayaamuhakalalenle namarandela. Eyotho kheentaphulelaru etthu, ti woomola epheyo paahi.