Read Makhuwa-Shirima Namalaleiya 5 Bible Online

Namalaleiya 5 - Makhuwa-Shirima bible

Namalaleiya 5

¹Nyuwo mwaarowaka vaNipuroni Nootteela* na Muluku mwiipasoope ni mweettelowaanyu. Fataari yoowo onkhuveela weera iiwe ohikhanle alolo ampaka sooveleela ehisuwelaka weera khaampaka nnene.

²Muhaakuvele wuuluma, hata murimaanyu ohikhale woowaakuva omuruuhela Muluku milattu. Muluku ori wiirimu ni nyuwo muri mulaponimu, tivawo muulumeke vakhaani paahi.

³Saattaxaka sootthukuruwela, simphuwa sooloha; ngwuulumaxani wa mulolo, ankhumaxa masu a siiyo.

⁴Nyuwo mwaaroromelihaka ni nlipelo, muhipise okwanihera nno, niwoko alolo khaanimusiveliha Muluku; mukwanihere nno.

⁵Fataari ohiroromeliha ni nlipelo ohikhanle ororomeliha woohikwanihera.

⁶Muhitthunihere eyanowaanyu wootthekihani. Muhimweerele namutthenga a Empa ya Muluku: Kootapanya opaka nlipelo nna.’ Omunyoonyihera heeni Muluku ni yeeyo munghimaanyu, ni omuhiyera heeni aphwataka yeeyo mpankaanyu?

⁷Sooloha sincipale ni masu mancipale khaantaphulelaru etthu. Tivawo mmoovekeno Muluku.

⁸Nyuwo mwamoona namahaawa ahasuliwaka mulaponi emoha, munoonatho weera onkhootteliwa soophwanela ni ekhaikhai, muhituthuwe; vano, khula mutokweene ookhalano namalamulaawe mutokweenexa, ni wa ooweeli awo, aakhalatho anaapwaha.

⁹Sooruwera sa elapo siri sooreerela wa ootheene; mwene muneene ongwinela seiyo.

¹⁰Yoowo onsivela musurukhu, khampwanyarutho yoomukwana; yoowo onsivela mihakhu, khahakalalelarutho seiyo ongwinaawe. Eyotho kheentaphulelaru etthu.

¹¹Saandyeerereyaka sooreela, anaandyeerereyatho yaawo anca. Yoowineleya heeni sinruuhaaya sooreela wa yoowo orino, ohikhanle woona ni maithwaawe paahi?

¹²Ikhove sa namuteko ti soosiva, hata acaaka vaakhaani naari vancipale, vaheera osareya wa namapuha, onimuruuhela naawalaphile.

¹³Yookhala yoonanara yoowoopihaxa koonnaaka mulaponi: Mihakhu sithukumanyiwe sinimuruuhela yoothananaxa muneene.

¹⁴Owo sinimuriheya mihakhusawe niwoko na oheettihawawe nnene. Ommaleloni mwaana aneeraawe amuyare khankhalano etthu.

¹⁵Mutthu oyariwe tiriya mmirimani mwa amayawe, ni mooteene yoowo onrwaawe, onrowatho hiiho. Mmutekoni wootheene ominyaalenlaawe, khanrowano.

¹⁶Yookhalatho etthu ekina yoothananihaxa: Mooteene yoowo mutthu onrwaawe, onrowatho hiiho, vano omphwanyani wiiminyaalelawawe wootheene, eenre oomolaka epheyo?

¹⁷Omviriha okumaawe wootheene mpiphini, ni makacamiho matokotoko, iretta ni othanana.

¹⁸Hiiho, kohoonelela weera wa mutthu, yoomureerela ni yootthunaawe, ti oca, owura ni opuha yeeyo ophwannyaawe ngwiiminyaalelanimwawe wootheene mulaponi mmahukuni vakhaani a okumi Muluku onimvahaawe, niwoko eyo ti yoovaheriwaawe.

¹⁹Vano, Muluku aamvahaka mukina mihakhu ni sooreela, ni aangwerihaka opuha seiyo, waakhulela yoovaheriwaawe ni ohakalalela mitekosawe, vano eyo ti yoovaha ya Muluku.

²⁰Mutthu owo khanuupuwela vancipale sa mahuku vakhaani a okumaawe, niwoko Muluku oomukhaliha oohikhalano nipeesa moohakalalani ni murima.