Read Makhuwa-Shirima Namalaleiya 8 Bible Online

Namalaleiya 8 - Makhuwa-Shirima bible

Namalaleiya 8

¹Taani onlikana ni namiruku? Taani ongwera otaphulela itthu? Miruku sinaariha ekhove ni sinceendya omora wa ekhovaawe.

²Olakawaka ti wu: Mwiiwelele malamulo a mwene niwoko nyuwo moolipela vamaithoni wa Muluku.

³Muhaakuve ovenya vamaithoni wa mwene, hata muhikhalele mpatta wa mulattu wootapanyeya, eenre mwene apakaka yeeyo ontthunaawe.

⁴Vano, masu a mwene ti ooceendyeya, ni khaawo ongwera omukoha: “Mumpaka eheeni?”

⁵Yoowo oniiwelela malamulo a mwene khahaawaru yakhalaru yoonanara, ni murima wa miruku, onoosuwela ehuhu ni moota woopwaherera.

⁶Vano, yookhala ehuhu yootthuneya ni mootatho ontthuneya wa khula yookhumelela, naari mukina ahaawaka yoolemelaxa.

⁷Vekhaikhai, khawoworu osuwenle ya muhoolo. Taani anaawere omuleela yeeyo eniikhumelele?

⁸Khawoworu ongwera olamula munepaawe; hata vakhaani khangweraru olamula nihuku na okhwawawe. Mooteene yoowo ohinkhalaawe ontthuniheriwa orowa owaani mweehuhuni ya ekhotto, hiihotho yootakhala kheenaatapuxa yaawo ampaka yeeyo.

⁹Sootheene iyo koonne kiixinnyereraaka otthokelela sootheene simpakiwa elapo ya vathi. Sookhala ihuhu mutthu onaalamulaawe akina, ommaleloniwaya oreene wiithananiha.

¹⁰Ohiya toko yeeyo, koowoona atakhali evithiwaka — yaawosa yaakhovelela orowa ni orwa vaNipuroni Nootteela* yaakhelaka sootthapela musidadeni mwa weiwo yaapakaaya itthu soonanara seiyo. Eyotho, kheentaphulelaru etthu.

¹¹Sootakhala saahittaruxiwaka woowaakuveya, murima wa mutthu onsareya soovaanela weera apake yoonanara.

¹²Mutakhali onoowera opaka sootakhala soohaalikeleya, ni orookhalaru hiiho, onkhalano okumi woowaatta, mene koosuwela nnenesene weera itthu sinooweettela nnene yaawo ammova Muluku, aani yaawo anoonihera nttittimiho ohoolowawe.

¹³Tivawo, wa atakhali khasiweettelaru nnene, niwoko khaammova Muluku, ni mahukwaaya khaampwaherera ntoko munttuusi wa oxekuwa.

¹⁴Yookhalatho etthu ekina ehintaphulelaru etthu mulaponimu: Oororomeleya anaakhela yeeyo enaaphwanela atakhali, ni atakhali anaakhela yeeyo enaaphwanela oororomeleya. Kinuupuwela weera eyotho kheentaphulelaru etthu.

¹⁵Tivawo olakawaka ti weera mpuhe okumi, niwoko mulaponi ya vathi kheewoworu yoomureerela mutthu ohikhanle oca, owura ni ohakalala. Itthu iyo sikhale asikhwaawe mmutekonimwawe woovihaxa wa mmahukunimwawe ootheene Muluku omvanghaawe mulaponi ya vathi.

¹⁶Kihokoleenleene otthokelela weera kisuwele ni koone miteko sa mutthu mulaponimu; mwa seiyo sinimuruuhela naawalaphile ohiyu ni othana,

¹⁷kaahiiwexexa sootheene Muluku opankaawe. Khaawo ongwera wiiwexexa seiyo simpakiwa mulaponi. Naari mutthu aminyaalelaka weera oonelele ekhalelo ya itthu, khamphwanya. Naari musuweli ahimaka weera onniiwexexa, vekhaikhai khangwera ophwanya.