Read Makhuwa-Shirima Namalaleiya 9 Bible Online

Namalaleiya 9 - Makhuwa-Shirima bible

Namalaleiya 9

¹Kaatthokelela yeeyo, kinoona weera oororomeleya ni anamiruku, vamoha ni seiyo ampakasaaya, siri mmatatani mwa Muluku. Seiyo sinaaweherera — okhalaka osivela hoye hoye othanya, khaawo asuwenle.

²Ootheene arino ommaleloni omoharu: Oororomeleya ni mutakhali, ooreera murima ni oonanara murima, ootteela ni oohitteela, ompaka sooveleela ni ohimpaka. Yeeyo emmweereela mutthu ooreera murima, emmweereelatho namattheka; emmweereela yoowo onroromeliha, emmweereelatho yoowo onoova ororomeliha.

³Yoonanara eri mwa sootheene sineereya mulaponi ya vathi ela, ti ela: Ommaleloni wa ootheene, ti omoharu. Ohiya sikina iyo, murima wa atthu woosareya soonanara ni soololo mookumini wootheene ni ommaleloni awosa animookhwa.

⁴Yoowo ori eriyari ya akumi ookhalano oweherera; vano, fataari mwalapwa mukumi ohikhanle mwatto ookhwa.

⁵Vano akumi aasuwela weera animookhwa, vaheera anamakhwa khaansuwelaru; wa yaawosa khanikhalaru ntthuvelo ni mpaka khaanuupuweleliwaru.

⁶Wa yaawosa, osivela, othanya ni nrima soolakaseya khalayi; kheekhalelaru mpatta etthu ya seiyo sineereya mulaponimu.

⁷Tivawo, muce ni ohakalala yoocaanyu, ni ngwure eviinyuwaanyu mutteeliweene murima, niwoko Muluku oohakalalela yeeyo nyuwo mumpakaanyu.

⁸Mahuku ootheene, ngwarele sa ofestani, ni muttikitthele makhura mmurumwanyu.

⁹Mpuhe okumi ni muthiyana munimusivelaanyu, mmahukuni ootheene a okumi ola ohintaphulelaru etthu, onoovahaaweni Muluku mulaponimu — mmahukuni ootheene ahintaphulelaru etthu! Vano, ela ti yoovaheriwaanyu mookumini ni mmutekonimwaanyu woovihaxa mulaponimu.

¹⁰Yeeyo antthunaaya ovara matataanyu, mpakeke ni ikurusanyu sootheene, niwoko mmahiyeni munrowaanyumo, khoowoworu muteko hata yoovaanela; kheewoworu esuwelo naari miruku.

¹¹Kohoonelela etthu ekina mulaponimu: Ooweraxa otthimaka, khaangwina mahuku ootheene a otthimakawaya; oolipa khaangwina mahuku ootheene mukhottoni; asuweli khaankhalano yooca mahuku ootheene; anamiruku khaankhala mathadyiri mahuku ootheene; niwoko ehuhu ni mikhalelo sinaakhalela ootheene.

¹²Ohiya toko iyo, khaawo osuwenle ehuhuwaawe: Mooteene yoowo ihopa simpharihiwaaya muttavini noowiiva, ni ipalame simpharihiwaaya munraakhoni, atthutho anreiwa itthavi mweehuhuni ya erisa ammorelaayamo moota yahaawehereraaya.

¹³Kaahoonatho mulaponimu ethoonyero ela ya miruku ekitamve vamurimani:

¹⁴Yaakhala esidade emoha ekhaanene, yamakiwe atthu vakhaani. Vano, mwene ooweraxa aahoorwa owanano, anarica ni ikaaro sookurumulela exiri sincipale sa ekhotto.

¹⁵Wa soothesene, musidadeni mmwe, aakhala mulopwana mmoha ohaawa, mene aari namiruku, ni mmirukunimwawe, owo aahoopola esidade. Vanonto khaawo yaamuupuwelenletho namahaawa ole.

¹⁶Tivawo kuupuwenlaaka: Miruku ti sooreera opwaha ikuru, vaheera miruku sa namahaawa ti soonyoosiwa, ni woowaakuveya maswaawe anoottiwaliwa.

¹⁷Masu oomaaleleya a namiruku yiiwiweke nnenesene, ohikhanle okhuwela wa yoowo onaalamula alolo.

¹⁸Miruku ti sooreera opwaha ikapwitthi sa ekhottho, vaheera namattheka mmoha paahi omphwata itthu sooreera sincipale.