Read Makhuwa-Shirima Ecipo Yooreeraxa 2 Bible Online

Ecipo Yooreeraxa 2 - Makhuwa-Shirima bible

Ecipo Yooreeraxa 2

¹Miyo ti ethutu yooxeera ya Saroni, aani ethuthu yooreeraxa ya mmareyareyani.

²Oosiveleyaaka ti eriyari ya amiravo ntoko ethutu yooreeraxa eriyari ya nyiiwa.

³Oosiveleyaaka eriyari ya amiravo ori ntoko emasiyera eriyari ya nyiri sa moothakoni. Kintthunaxa okilaathi vamunttuusinivawe ni yoowiimaawe ti yoocoocowaxa vanluminiwaka.

⁴Owo aakirongha vasaala ya ifesta, ni ebandeiraawe mwa miyo, ti osivela.

⁵Dyoontte mukicihe iwuuva* soowuumihiwa, mukikhomaalihe ni masa, niwoko kimvoreiwa osivela.

⁶Moonowaawe woothiyana, onkhala waamuruwaka, ni moonowawe woolopwana, onkikhubaara.

⁷Asithiyana a oYerusaleemu, miyo kinoodyoonttelelani mwa anaahe ni ikorsa sa ntuphini: muhivenye mukhoveni hata muhitannye osivela ehuhuwaaya ehinaaye.

⁸Ngwiriyane! Ti oosiveleyaaka! Moone! Owo ongwa weiwo atuphaka mmanyaakoni, iinaka mmattumuxani.

⁹Oosiveleyaaka ori ntoko naahe, aani ntoko napunci a naahe. Moone! Owo ori wiithela exiraahu, aweheraka muxanelani, athurumelaka mmwiikitthoni.

¹⁰Oosiveleyaaka aahuuluma, anakeerela: “Oosiveleyaaka, mweemele; ooreeraaka, mukitthare.”

¹¹Moone! Eyiitta yoovira; epula yoomala, enarowa.

¹²Ithutu sinttuva mulaponi, ni yoophiyera ehuhu yoowiipa; mulaponimwahu oniiwanyeya wiipa wa ikhunda.

¹³Mwiri wa ifiigu oniima soowiima soopacera; iwuuva* sinttuva onamwareela wunkhelawaya. Mweemele, murwe oosiveleyaaka; ooreeraaka, nrowe.

¹⁴Ekhundaaka eri mmakhukuni a nyala, moowiipitha muxerexere nyaako, mukoonihere ekhovaanyu, mukihiye kiiwe nsunanyu; niwoko nsunanyu ti noosiveleya, ni ekhovaanyu ti yooreeraxa.

¹⁵Munivarele akhwatte, axaana a akhwatte annanariha imatta sa iwuuva*, niwoko imattasahu sa iwuuva* soottuva.

¹⁶Oosiveleyaaka ti awaka ni miyo ti awawe; owo onciha eriyari ya ithutu sooreeraxa.

¹⁷Muhokolowe oosiveleyaaka ohinaaye wiila ni sihinaaye olakaseya nyunttuusi; mukhale ntoko naahe hoye hoye ntoko napunci a naahe mmattumuxani oovinavineya.