Read Makhuwa-Shirima Ecipo Yooreeraxa 3 Bible Online

Ecipo Yooreeraxa 3 - Makhuwa-Shirima bible

Ecipo Yooreeraxa 3

¹Ohiyu wootheene vabeettiniwaka koomwaasaasa yoole onimusivelaaya murimaaka, mene nkimphwannye.

²Vano kinoovenya kiviravireke musidadeni, kinoovira mmiseweni ni mmapuronimwaya; kinoomwaasaasa yoole onimusivelaaya murimaaka. Miyo koomwaasaasa, mene nkimphwannye.

³Anamalipelela yaakikumanano yeetteettaaya musidadeni, ni miyo kaahaakoha: “Nyuwosa moomoona yoole onimusivelaaya murimaaka?”

⁴Kipwahakaru, kaamphwanya yoole onimusivelaaya murimaaka. Miyo kaamvarela kihimuhiyaka arowaka, mpaka omphiiha vaate wa amayaka, aani mukwaartuni mwa yaale akiyanre.

⁵Asithiyana a oYerusaleemu, miyo kinoodyoonttelelani mwa anaahe ni ikorsa sa ntuphini: muhivenye mukhoveni hata muhitannye osivela ehuhuwaaya ehinaaye.

⁶Taani yoowo onrwa aweelaka munikareni ntoko otthuwa wa mwiixi, wunkhelihiweene ni makhura a emira*, erubani* ni itthu sootakansiwa ni makhura ooreera sootheene sa anamathumiha?

⁷Moone! Ti ekaaro ya ehice ya emwene ya Salomoni, enghooliwa ni anakhotto miloko mithannamosa ari ooweraxa a oYixrayeli;

⁸ootheene awo eherenreene ikatana, ni oowera mukhottoni, khula mutthu ni ekatanaawe munluwoni, iireherenreene weera awanane otteengula wa ohiyu.

⁹Mwene Salomoni ohiipakela ekaaro ya ehice ya emwene; owo opakenle itthaabwa sa oLibanu.

¹⁰Imettosaya opakenle eparatha*, nipathonaya na eyuuma yoorikaxa. Enkilaatheliwa opakenle sa kanka, mpuwamwaya orehereriwe nnenesene ni asithiyana a oYerusaleemu.

¹¹Asithiyana a oSiyoni, mvenyase! Murwe, mmoone mwene Salomoni! Owo ongwara ecireemba, mwa yeeyo yaangwaringhaaya amayawe vanihukuni na othelawawe, aani nihuku waahakalanlaaya murimaawe.