Read Makhuwa-Shirima Ecipo Yooreeraxa 6 Bible Online

Ecipo Yooreeraxa 6 - Makhuwa-Shirima bible

Ecipo Yooreeraxa 6

¹Okenle woowi oosiveleyaanyu, nyuwo ooreeraxa a asithiyana? Munileele okenlaawewo oosiveleyaanyu ni hiyo nnoomwaasa vamoha ni nyuwo.

²Oosiveleyaaka okenle ottimbeniwawe, omikhutuni wa soosivasiva, weera awehawehe ni avurule ithutu.

³Miyo ti a oosiveleyaaka, ni oosiveleyaaka, ti awaka; owo ongwehaweha eriyari ya ithutu.

⁴Oosiveleyaaka, nyuwo ti ooreera ntoko oTireza, ni oophwaneliwa ntoko oYerusaleemu, oovuwiheya ntoko anakhotto ni ibandeirasaya.

⁵Mukihuluwe, niwoko owehawanyu onookitutha. Mayihaanyu ari ntoko muhuwo wa ipuri sinrweela oGiliyade.

⁶Mainowaanyu ari ntoko muhuwo wa ikhondoolo singweela onkatthiwa. Khula muhuwo oneetta piili piili, kheewoworu ehikhanle ni axaana.

⁷Mphatamaarumwanyu ori wiithela wa eluttu onlikana ni ekapatthi ya yoowiima ya eromazera*.

⁸Naari ekhanleene mapwiyamwene miloko mithannamosa, ni axaaseeta miloko mithannamiraru, ni waatta woohaalikeleya wa asimwali oowiikosoopa,

⁹hata hiiho owo ti mmoharu, ekhundaaka, ookwanelaaka! Owo ti mwaana muthiyana oohaaweleyaxa a amayawe, aani oosiveleyaxa a yaale amuyanre. Asimwali akina aamoona, enamuttottopela; mapwiyamwene ni axaaseeta, annimuttapahera.

¹⁰Taani yoola onkhumelela ntoko ekamaama ya oxa, omphwaneliwa ntoko mweeri, ontutha ntoko nsuwa, ootikhiniheya ntoko ithenyeeri mphironimwaya?

¹¹Koorowa moothakoni wa inogeira, weera koonewo iphuwela sa mureyareyani ni weera koone ivideira saaphuwaleene ni irooma* saattuvaleene.

¹²Kihinaaye osuwela, koonnewene kireene eriyari ya ikaaro sa emwene sa mulokwaaka.

¹³Muhokolowe, muhokolowe, Muxulami; muhokolowe, muhokolowe weera niwooneeni. Heeni mummoonaanyu ookwanela owo ntoko aareene wiina wa oManahayimi?