Read Makhuwa-Shirima Ecipo Yooreeraxa 7 Bible Online

Ecipo Yooreeraxa 7 - Makhuwa-Shirima bible

Ecipo Yooreeraxa 7

¹Moota sireenraaya inaawosawe, siwanreene ikwakwaatta, ii! Mwaana muthiyana a mwaana mulopwana a mwene! Ottiminuwa wa eyuunuwaanyu, ori ntoko axiveeve, oopakiwa ni matata a namaratta.

²Mutekhwaanyu ti ekoomixi yoovilikeya ehinthowaayamo eviinyu yoosivaxa. Eyuunuwaanyu ti etrigu yoowuukeliwa ericiweene ithutu sooreera.

³Mapelaanyu ari ntoko axaana eeli a naahe, aani maphapo a naahe.

⁴Nxikonanyu nri ntoko etoore* ya maino a etthepo. Maithwaanyu ari ntoko vankatthiwa wa oHexeboni, vamulako wa oBate — Rabimi. Ephulaanyu eri ntoko etoore* ya oLibanu ewenghe oDamasku.

⁵Murwaanyu ori woovuwiheya ntoko mwaako Karameli. Otaphuwa wa mayihaanyu atthaveliwe moota wa emwene; mwene oovareya mmattuuttonimwawe.

⁶Moota mphwaneliwaanyu! Moota munkisivelihaanyu! Ii!, oosiveleyaaka ni moota musareiyaanyu osiveliha!

⁷Ekhalelowaanyu eri ntoko nivare, ni mapelaanyu ntoko ikhuce sa soowiima.

⁸Miyo kaaheera: “Kinoowela nivare, kivareleke soowiimasaya.” Mapelaanyu ekhaleke ntoko ikhuce sa iwuuva*, wunkhela wa iphumusanyu ntoko masa.

⁹Eyanowaanyu ekhaleke ntoko eviinyu yooreerelaxa empiluwenle moota wooreerela oosiveleyaaka, ekhwalalelaka iyano ni maino.

¹⁰Miyo ti a oosiveleyaaka, ni owo onkihaawela miyo.

¹¹Murwe, oosiveleyaaka, nrowe mmittettheni, nivirihe ohiyu mmuttettheni.

¹²Nipeherere orowa omatta wa iwuuva* weera noone ivideira saaphuwaleene, ithutusaya saathapurungweene ni irooma* saattuvaleene; wu miyo kinimoovahani osivelawaka.

¹³Imadragora* sinaandyeera wunkhelawaya, ni vamulakwaahu wookhalano moota wootheene wa soowiima sooreera, soowuuma ni sooriirela, koothokororenlaakani nyuwo, oosiveleyaaka.