Read Makhuwa-Shirima Yesaya 1 Bible Online

Yesaya 1 - Makhuwa-Shirima bible

Yesaya 1

¹Moonelo mwaha wa oYuda ni oYerusaleemu Yesaya, mwaana mulopwana a Amozi aaraaweno, moolamulani mwa Uziya, Yotami, Ahazi ni Hezekiya, mamwene a oYuda.

²Mwiiwe wiirimu; ngwiriyane elapo ya vathi, niwoko Yave eenre: “Miyo kohaapattuxa anamwane kinawunnuwiha, mene awosa aakirukunuwela.

³Emombe elopwana yoomusuwela pwiiyaaya ni buuru oosuwela nikhoola na pwiiyaawe, vaheera aYixrayeli khaasuwenle etthu; mulokwaaka khooniiwexexa.”

⁴Ii!, muloko woottheka, ekhapira elemelingwe sootakhala, nakupa a anyali; anamwane avaheriwe ohitteela! Awosa aamuhiya Yave; aamuramusa Ootteela a oYixrayeli, emukhoottaka Yoowo.

⁵Ontthunela heeni opwaherera ottaruxiwa? Munnyesererelani ovaanya? Muruwaanyu wootheene ori makhwattaru ni murimaanyu wootheene woovoreyeya.

⁶Erutthu yootheene khoowowo ori vakumi — paahi makwattharu, ovoreyeya ni anantthweenye — ahilamihiwe naari ahitthukiweru ni algadura hata ahikurunuxiwe ni makhura.

⁷elapwaanyu yoophwatiwa; isidadesanyu soohisiwa ni mooro; imattasanyu soohuhuliwa ni anamarwa vamaithoniwanyu; siphwatiwaka ntoko sinkuxiwaaya ni anamarwa.

⁸Ohanle paahi mwaana muthiyana a oSiyoni ntoko nipuro nootthawela mmatta mwa eviinyu, ntoko yoowaakiha mmatta mwa mwiirukule ni ntoko esidade yooriciwa.

⁹Yave a ikuru sootheene ahaawuurenle akina akina a hiyo, saano nipakeiyeene ntoko oSodoma ni oGomora.

¹⁰Mwiiwe masu a Yave nyuwosa anamalamula a oSodoma; ngwiriyane Nlamulo na Muluku, nyuwosa amaki a oGomora.

¹¹Yave oneera: “Sooveleelasanyu soowaatta nkipwattha. Miyo kookhalano sooveleela soohisa soopwahaxa sa anapunci ni sa makhura a axaana a imombe. Ephome ya imombe ilopwana, iputtiputthi ni ipuri kheekihakalaliha.

¹²Nyuwosa mwaarwaaka wa Miyo vano taani aweerenleni weera munyikale mapuwaaka?

¹³Muhiyerere okiruuhela sooveleela soohimuteko. Erubanaanyu ti ya mwiikho wa Miyo. Nyeeri sinyowani, iSaabadu ni mithukumano — nkingwera ovilela iyo soosareya soonanara!

¹⁴Kinthanyaxa ifestasanyu sa nyeeri sinyowani ni sa sikina; seiyo soothatuwa soolemela wa Miyo. Nkingwera ovilelatho.

¹⁵Mwaatheteyaka matata mmavekeloni, kinimoohuluwani. Naari mwaandyeeraka mavekelowaanyu, nkiniiwa. Matataanyu aasareya ephome.

¹⁶Mwiirapihe ni mwiitteelihe. Mvenxeke mitekosanyu soohitteela vamaithoniwaka! Muhiyerere opaka yoonanara,

¹⁷muxuttere opaka yooreera, mwaasaase ekhaikhai, mmalihe nihasu. Ngwanele soophwanela sa akwaasuni ni mwaakihe mulattu wa asinaamukhweli.”

¹⁸Yave oneera: “Ngwe, nuulume mulattu ola. Naari sootthekasanyu siriipaleene phii, nsikhale sootteela ntoko ephepa; naari sixeeraleene zuu, sinootteela ntoko etthabwe.

¹⁹Nyuwosa mwakhala oolikaneene wiiwelela, munimooca soowiima sooreerela sa elapo ela;

²⁰Vaheera mwakhootta munavaanya, munoonyaanyiwa ni ekatana.” Vano eyano ya Yave ti yeenre yeeyo.

²¹Moone esidade yoororomeleya ethatungwaaya puuta. Khalayi yaasareya ekhaikhai emakiwaka ni wookoleleya, mene vano yoosareya anamwiiva!

²²Eparathaanyu* yoothatuwa ikokhola ni eviinyuwaanyu yooreera yoothatuwa arekha.

²³Anamalamulaanyu ari anamavaanya aneetta vamoha ni anamwiiya; awosa ootheene ansivela makhwankwa yaasaasaka soovahiwa. Awosa khaanaakiha soophwanela sa akwaasuni ni khaanaasaasa osuwela mulattu wa asinaamukhweli.

²⁴Tivawo, muneene Yave a ikuru sootheene, Ooweraxa a oYixrayeli onlaleiyaawe: “Ii! Kinimwaapattihera isara awananaaka ni kinoowiinlela ikukuttula amwiittanaaka.

²⁵Kinimootheteelani ntata; kinoovenxa soohitteelasanyu, kisusihaka sootheene siri soonanara mwa nyuwo.

²⁶Kinimoovahanitho aphuki ntoko a khalayi ni anamalaka ntoko yaaraaya ompacereroni. Vahoolowaya muniimwiitthaniwa Esidade ya Ekhaikhai, Esidade Yoororomeleya.”

²⁷oSiyoni onoovuluxeya mweekhaikhaiyini ni yaale oorukunxa murima ni oororomeleya.

²⁸Vaheera anamavaanya ni anamattheka anoophwatiwa ni yaawo animuhiya Yave anooriheya.

²⁹“Munimuulihiheya muru niwoko na nyiri sa ikarivalyu* sootteeliheriwa muntthunaanyuxa; munooyevihaxiwa niwoko na mattimbe muthanlalaanyu.

³⁰Munookhala ntoko mwiri wa ekarivalyu* yoomora makukhu, ni ntoko nttimbe noohikhalano maahi.

³¹Mulopwana oowera onoothatuwa imbarumbaru ni mutekwaawe ntoko maaceeso; owo onoohisa vamoha ni mutekwaawe, ahikhalakaru oocipiha.”