Read Makhuwa-Shirima Yesaya 10 Bible Online

Yesaya 10 - Makhuwa-Shirima bible

Yesaya 10

¹Ii! Anoohaawa yaale ampaka malamulo oohiroromeleya, yaale anlepa ikano soohasula

²weera eriirihele soophwanela sa oohaawa ni sa ekhaikhai sa oohasuliwa variyari wa mulokwaaka. Atthweene yaale anaakhaliha asinaamukhweli yoolupatthaaya ni angwiiyera akwaasuni.

³Mmwipakeni nyuwosa munihukuni na nthorihelo, erisa yaarweelaka ottai? Wa taani muneeraanyu mutthimakele weera ookhavihereni? Mmwahiye woowi mihakhusanyu?

⁴Kheewo muneeranyu mpake ohikhanle wiipitha variyari wa anamatthukiwa hoye hoye omorela eriyari ya anamakhwa. Sirookhalaru sootheene iyo, isara sa Muluku khasihapungwe ni ntatanawe nri etheteeliwo.

⁵Ii!, awAsiriya anoohaawa! Awosa ti ekopo ya onyoonyiwawaka ni mmatatanimwaya ori murepettho wa isarasaka.

⁶Miyo kinrumihela muloko woomurakamela Muluku, wa muloko onkinyoonyiha, weera ohuhule ni waakhe sooreela ni weeratho ovotte ntoko ittoko sa mmiseweni.

⁷Vaheera kheehiyono ti yeeyo owo ontthunaaya hata oomvaanelaaya; otthunawaya waari ophwata ni omaliha miloko sincipale.

⁸Awosa aneera: “Ootheene a asitokweenaahu a anakhotto ari mamwene.”

⁹Yeeyo yaakhumelenle ni Karekemixi yaakhumelela ni Kalnu. Vekhaikhai Hamati onlikana ni Arepadi oSamaria ni oDamasku.

¹⁰Ntananaka noowina imwene sa miluku soolokottha iye, mwa seiyo icaambulosaya siri soowaatta opwaha miluku sa oYerusaleemu ni oSamaria.

¹¹Vekhaikhai kinoopakela oYerusaleemu ni icaambulosaya seiye kipakenlaaka oSamaria ni milukusaya.

¹²Yave aamalihaka mutekwaawe wootheene wa mwaako Siyoni ni oYerusaleemu, owo onimweera: “Kinoomuttaruxa mwene a wAsiriya niwoko na wiixoona ni wiivuwihawawe wa murimaawe ni na owehawawe woowiikuxerera.

¹³Niwoko owo oneera: ‘Koopaka yeeyo ni ikuru sa ntatanaka ni niwoko na mirukusaka ni wiiwexexawaka. Koosusiha nyiinano sa miloko, kinahuhula mihakhusaya; kohaakuxa mamwenaaya ntoko mutthu ooweraxa.

¹⁴Mooteene yoowo mutthu onookolaawe moono weera apixeere epuuru, hiiho kohookola moono weera kikuxe mihakhu sa miloko; mooteene yoowo atthu anthukumanyaaya mooce oohiiwa, hiihotho koothukumanyiha miloko. Khawoworu omvavela ni mapuphaawe hata oneera swi.’”

¹⁵Weeraka epaso enimulamulela yoole omvarela muteko hata seroti oniingyeviha yoole onimuramaramiha? Waamukhala ntoko ekopo emuramaramihaka ovarenle hata ttootto simweemexaka seiyo sihikhanle etthaabwa.

¹⁶Tivawo Namalamula, Yave a ikuru sootheene onaarumihelaawe eretta yoophwata anakhottwaawe ooweraxa; vanipuroni na ovuwawawe onoopattihiwa mooro ntoko malumi ooviha.

¹⁷Waara wa oYixrayeli onoothatuwa mooro; Ootteelaawe nlumi na mooro. Munihukuni nimoharu Owo onoomuhisa ni onoomulaliha rupulula ni nyiiwasawe.

¹⁸Mooro owo onoophwataxa ovuwa wa othakwaawe ni imatta sooruwereya ntoko mutthu ongyavayavaawe ni ekwerere.

¹⁹Nyiri sineera sihalahale moothakoni mwa wAsiriya nsikhale vakhaani mpaka mwaana mukhaanene ongweraawe waalikela.

²⁰Vanihukuni nenenenno oohalahala oYixrayeli; yaale eniikhale ni okumi a ekhapira ya Yakobe khayaaroromela yaale yaavulalinghe, mene anoomuroromelaxa Yave, Ootteela Yoowo a oYixrayeli.

²¹Oohalahala a oYixrayeli onoohokolowa, aani oohalahala a Yakobe onoohokoleela wa Muluku Ooweraxa.

²²Naari mulokwaanyu oYixrayeli okhalaka ntoko muhaava wa mphareiya, oohalahala vakhaani ti eneera ehokolowe. Ophwatiwa oolamuliwa ni onimoowa woosareya ekhaikhai.

²³Namalamula, Yave a ikuru sootheene onookwanihera ophwatiwa olamuliwe mweelaponi yootheene.

²⁴Tivawo, ti yeeyo Namalamula, Yave a ikuru sootheene oneeraawe: “Ii! Mulokwaaka munkhala oSiyoni, muhiwoove awAsiriya naari yoottaruxakani ni ekopo hata eweemexerakani murepettho, ntoko yaapankaaya awExipitu.

²⁵Woonyoonyeriwaniwaka onoomala woowaakuveya, ni isarasaka sinoohokolowa weera saaphwate.”

²⁶Yave a ikuru sootheene onimwaawaxula awAsiriya ni ekwaambaawe, ntoko aapankaawe oMidiyani vamwala wa Orebi ni onootheteela ekopwaawe mphareiya, ntoko aapankaawe wExipitu.

²⁷Vanihukuni nenenenno yoolemelaaya enoovenxiwa mmakhatanimwanyu; aani vaxikoniwanyu. Yoolemela enoophweeya niwoko nyuwosa munoonenevaxa.

²⁸Awosa amvolowa wAyati; amvira oMigeroni; anthokorora sooreelasaya oMikemaxi.

²⁹Amvira mukhatoni yeeraka: “Nivireke ni ohiyu, nakoneleke oGeba.” oRama onthukumela; oGibeya wa Sawuli ontthawa.

³⁰Mukhuwele, amaki a oGalimi! Mwiiwe oLaixa! Ii! wAnatoti!

³¹oMademena ontthawa; amaki a oGebimi aniipitha.

³²Olelo awosa ankela weemela oNobi ekungelaka icipakhirasaya vamwaako wa Mwaana Muthiyana a oSiyoni; vanttumuxani na oYerusaleemu.

³³Moone, Namalamula, Yave a ikuru sootheene onimuuha iphandi soolipaxa. Nyiri soorakama sinimuuhiwa; seiyo soorakamaxa sinoomoroxeliwa vathi.

³⁴Owo onimuuha othako ni epaso; oLibanu onoomora ohoolo wa Namaweraxa.