Read Makhuwa-Shirima Yesaya 11 Bible Online

Yesaya 11 - Makhuwa-Shirima bible

Yesaya 11

¹Niphuwa nnoophuwa munikottoni mwa Yixai; mukwankhwaarinimwawe enoophuwa ephandi enyowani.

²Munepa wa Yave onookhala ni yoowo — Munepa wa miruku ni wiiwexexa; Munepa wa olaka ni ikuru; Munepa wa osuwela ni omoova Yave

³ni owo onoohakalalela omuttittimiha Yave. Owo khathoriha awehaka ekhove, hata khalakela attharaka yeeyo iiwalaawe.

⁴Owo onaareherera oothoiwa mweekhaikhaiyini ni onaalakelela moota woororomeleya oohaawa a elapo ya vathi. Onoomana elapo ya vathi ni ekopo ya eyanowaawe; onoowiiva atakhali ni iphumusawe.

⁵Ekhaikhai eniikhale yoowiitthukelano vakakasani ni ororomeleya laamba a muyuununi.

⁶mwiici onookhala vamoha ni eputtiputthi; havara onimwiixaatalela vamoha ni epuri; mwaamobe, mwatto ni emombe yooneneva enimooca vamoha ni mwaana mukhaani ti anaakukhule.

⁷Emombe ethiyana enimooca vamoha ni ursu* ni axaanaaya animwiixaatalela vamoha, ni mwatto onimooca malaxi ntoko emombe.

⁸Mwaana mukhaani onootheela vakhiviru wa mwiithe wa enowa; owo onoovolongha ntatanawe mpuuruni mwa evili.

⁹Khaawo anaapakeru yoonanara hata anaphwate yakhalaru etthu vamwaakoniwaka wootteela, niwoko elapo eniisareye ni omusuwela Yave ntoko maahi ankhuneela ephareiya.

¹⁰Vanihukuni nenenenno Mukwankhwaari wa Yixai onuukhale ntoko eneneero wa miloko; iyo sinoomwaattamela ni nipuronawe noowiitthuuwa nnikhale noovuwa.

¹¹Vanihukuni nenenenno Yave onimookolatho moono weera aahokoloxere oohalahala a mulokwaawe ahiiwe wAsiriya, wExipitu, oPatrosi, oKuxe, wElami, oBabiloniya, oHamati ni icirumba sa mphareiya.

¹²Owo onimweemexa eneneero wa miloko ni onaathukumanyiha anamatthukiwa a oYixrayeli; onoothukumanyiha muloko woomwaramwaxeya wa oYuda wa ilapo sootheene.

¹³Ehace ya Efrayimi enkoongora ni amwiittana a oYuda anoomalamalihiwa. wEfrayimi khookhalela ehace oYuda, hata oYuda khawiitta wEfrayimi.

¹⁴Awosa anoovoleela mukerekhere nyaako sa aFilisti mpatta ninkela nsuwa ni anoohuhula muloko wa mpatta ninkhuma nsuwa; anookuxa wEdomi ni oMowabe, ni awAmoni anoolamuliwa ni yaawo.

¹⁵Yave onimuumiha mpatta wa ephareiya ya wExipitu; onoomukuphula mooloko Efratesi ni ntatanawe apakihaka epheyo yoowuupaxa. Owo onoomukawanyiha mirora mithannamiili moota wooweera atthu anoowera olapuwa ni ikwakwaatta.

¹⁶Onuukhale musewe mutokotoko wa oohalahala a mulokwaawe ohiiwe wAsiriya, ntoko waaraaya wa aYixrayeli ehuhuweene yeele yaakhumaaya wExipitu.