Read Makhuwa-Shirima Yesaya 13 Bible Online

Yesaya 13 - Makhuwa-Shirima bible

Yesaya 13

¹Masu a Muluku mwaha wa oBabiloniya, Yesaya, mwaana mulopwana a Amozi, aakhenlaawe mmooneloni ti ala:

²Mweemexe eneneero vanttumuxani noohimela etthu; mwaakhuwelele yaawo; ngwiitthane ngwuuvelaka ntata weera evolowe mmilakoni mwa maneethi.

³Miyo kohaalamulela ootteelaaka weera ekwanihere isarasaka; koowiitthana anakhottwaaka ooweraxa, yaawosa anghakalalela owinawaka.

⁴Mwiiwe onyakula vamwaako ntoko wa atthu ancipalexa. Mwiiwe ti okhuweliwa variyari wa omwene ntoko miloko sithukumanaka munkuttulani woowaatta. Yave a ikuru sootheene onaathukumanyiha anakhotto weera ewane.

⁵Awosa anrweela mweelaponi sa ottai; ekotenle erimu — Yave ni ikapwitthi sa isarasawe — weera aphwate mwa yaawo elapo yootheene.

⁶Mulalamike, niwoko nihuku na Yave nookhuveela; nnimoowa ntoko ophwata wa mpatta wa Namaweraxa.

⁷Niwoko na yeeyo matata ootheene anootondolowa ni mirima sa atthu ootheene sinooporora ni woova.

⁸Onimwaavara woova; ovoreya ni othanana onimwaalamula. Awosa anoovoreyeya ntoko muthiyana ayaraka. Anoowehana ootuthuwaxeene, ikhovesaya sivihereiyeene.

⁹Moone, nihuku na Yave nnimoowa; nihuku noonanara noosareya isara ni onyoonyiwa vancipale. Munihukuni nno elapo enooheleya nthala ni anamattheka anoophwateya.

¹⁰Ithenyeeri sa wiirimu ni nakupaaya khasaara. Nsuwa nikhumaka nnooheliwa epiphi ni mweeri khawaara.

¹¹Kinoottaruxa elapo ya vathi niwoko na yoonanaraaya; atakhali niwoko na sootakhalasaya. Kinoomaliha wiixoona wa oowiikuxa ni kinooyeviha wiixoona wa oowuuma murima.

¹²Kinimwaavukula atthu opwaha eyuuma yoorikaxa, aani yoothowathowaxa opwaha eyuuma yoorikaxa ya wOfiri.

¹³Tivawo kineeraaka kithukumelihe erimu ni etthaya enootetereya vanipuroniwaya niwoko na isara sa Yave a ikuru sootheene vanihukuni na onyoonyiwawawe woopatta.

¹⁴Khula mutthu onoohokoleela mulokwaawe ni onootthawela elapwaawe ntoko naahe onlupatthiwa, ntoko ekhondoolo yoohikhalano mukukhuli.

¹⁵Ootheene eniivariwe anoohommwa; ootheene eniiphwanyiwe anookakatthiwa.

¹⁶Anamwanaaya asikhaani anoohononeliwa vamaithoniwaya; vaatewaya onoohuhuliwa ni axaaraya anoopuheriwa.

¹⁷Moone, kinimwaatannya aMedesi weera yaawaneno. Awosa khaampwatthela eparatha* hata eyuuma yoorikaxa.

¹⁸Nyuupasaya sinimwaamoroxa amiravo; awosa khayaamorela ikharari asikhaani hata anamwanaaya.

¹⁹oBabiloniya, nluku noowaaraxa na omwene wootheene, waara wa ovuwa wa aBabiloniya, onoophwatiwa ni Muluku ntoko oSodoma ni oGomora.

²⁰Khawoworu aniitekihewotho naari khawoworu anaamakewo wa mahuku ootheene. Khawowo ngwArabi anaakungewo eheemaawe hata khawoworu mukukhuli aniitthuuwihewo muhuwaawe.

²¹Vaheera soopattuxiwa sa munikareni sinookhalawo ni impasaya anoosaramo akhwatte. Mwemmo sinoomakamo isiisi ni ikhomaci sinootuphamo.

²²aKusupa animwiipa vanipuroni noolipaxa na oBabiloniya ni akhwatte mpaanimwaya sitokotoko sooreeraxa. Ehuhuwaaya eneera emalaka ni mahukwaya khaampwahererihiwatho.