Read Makhuwa-Shirima Yesaya 14 Bible Online

Yesaya 14 - Makhuwa-Shirima bible

Yesaya 14

¹Yave onoomorela ikharari ekhapira ya Yakobe; onoothanlatho ekhapira ya Yixrayeli ni onootekiha mweelaponimwayaxa. Anamarwa anookhala ni yaawo epakelaka mpatta ekhapira ya Yakobe.

²Miloko sinoophwanya yoowo siroiheke mmapuronimwayaxa. Ekhapira ya Yixrayeli enoolamula miloko ntoko ipottha ilopwana ni ithiyana mweelaponi mwa Yave. Awosa animwaakhaliha anamatthukiwa anamavaraaya ni animwaalamula anamahasulaaya.

³Vanihukuni Yave aneeraawe oovaheeni, wiitthuuwa wa ohaawa, makacamiho ni otthukiwa wa oxilili,

⁴nyuwosa munoomutthebwa mwene a oBabiloniya: Ngwehe ekisero ya namahasula! Moone ommaleloni wa isarasawe!

⁵Yave ohintaka ekopo ya atakhali, ekopo ya emwene ya anamalamula,

⁶mwa yaawo yaamanelaayano miloko moota woohihiyerereya oonyoonyiweene ni, oosareiyeene isara, yaanyaatula miloko ni osoonda woohimala.

⁷Ilapo sootheene sookhalano wiitthuuwa ni mmaaleleyo; sootheene simpacera wiipa ni ohakalala.

⁸Mpakatho nyiri sa ipinyeiru* ni sa isedari* sa oLibanu sinoottottopelani, seeraka: “Mweenre muuhiwaka, khawoworu nakhuuni aneera arwe onuuha.”

⁹Ngwiixerani okhwa ori woowali weera owaakheleni mwaarwaaka; owo omvenyereriha minepa sa anamakhwa weera sooxekureni — ootheene yaale yaari ahooleli mweelaponi ya vathi; owo onaavenyereriha vahiceniwaya — ootheene yaale yaari mamwene a miloko.

¹⁰Ootheene yaawo anoomwaakhula; awosa anooweerelani: “Nyuwotho moothatuwa oohilipa ntoko hiyo; moothatuwa ntoko mmoha a hiyo.”

¹¹Waarawanyu wootheene wookuruxiwa omoroxeliwaka munihiyeni vamoha ni oruma wa makitaanyu; macanama ari vathiwanyu — moosareya nyuungu.

¹²Ii! Ethenyeeri ya oxeexelo, mwaana a oxa! Moota mmonraanyu wiirimu! Moota mmoroxeliwaanyu vathi — nyuwo khalayi mwaaphwata miloko sincipalexa.

¹³Nyuwo mwiixeerela: “Kinoowela wiirimu; kinimweemexa ehicaaka ya emwene osulu wa ithenyeeri sa Muluku; kinookilaathi vamwaako wa muthukumano; vathokani sa mwaako wootteela.

¹⁴Kinoowela osuluxa opwaha mahutte oorakamelaxa; kinimwiikhaliha ntoko Muluku.”

¹⁵Vaheera mookuruxeliwa munihiyeni; mpuwa ngwiixerani.

¹⁶Yaale angwoonani anootikhina; awosa antthokelela ommaleloniwanyu: “Mulopwaneene ti yoola aathukumeliha elapo, aattikinya imwene,

¹⁷aatatuxa elapo ya vathi nikare, aawina isidade ahitthuniheraka weera anamatthukiwaaya ehokoleele owaani?”

¹⁸Mamwene ootheene a miloko anaataleleya moovuwani, khula mwene munihiyenimwawe.

¹⁹Vaheera nyuwo munkhumihiwa munihiyenimwanyu mvonyeriwaka vaate ntoko ephandi yookhoottiwa, ntoko soowara sa anamakhwa yiiviwe ni ekatana, ntoko yaale ankhuruwela mmalukuni a nlitti, ntoko muttembo woonyikalasiwa.

²⁰Nyuwo khamvithiwa vamoha ni mamweneene yaawo niwoko moophwata elapwaanyu mwiivaka mulokwaanyu. Ekhapira ya atakhalai kheeromoliwatho wa mahuku ootheene.

²¹Mureherere nipuro noowiivela anamwanaawe niwoko na soottheka sa makholowaaya; awosa ehivenyeru weera yaakhele elapo esarihaka isidadesaya.

²²Yave a ikuru sootheene onghima: “Miyo kinimwaawanano yaawo. Kinoovenxa mwa oBabiloniya nsinanaya, anamahalahalaaya, anamwanaaya ni ekhapiraaya,” onghima Yave.

²³“Kinootatuxa oBabiloniya nipuro na isisi ni elapo ya mattapo; kinookwesa ni mvelo wa ophwata,” onghima Yave a ikuru sootheene.

²⁴Yave a ikuru sootheene oolipela: “Vekhaikhai, yeeyo kivaanenlaaka enookhumelela ni yeeyo kintthunaaka enimweereya.

²⁵Kinoophwata wAsiriya mwelaponimwaka; kinimwaanyikalela mmanyaakonimwaka. Yoolemelaaya enoovenxiwa mwa mulokwaaka ni murittaaya mmakhatanimwaya.”

²⁶Eyo ti yoovaanela ekhaliheriwe elapo yootheene; ola ti moono wookoleliwe miloko sootheene.

²⁷Vano Yave a ikuru sootheene oolakela ni taani anaawere oohiiha? Moonowaawe ti woowookoweene ni taani anaawere ohokoloxa?

²⁸Vayaakhani aakhwiiyawe mwene Ahazi yaavahiwa masu anooperera ala:

²⁹Nyuwosa aFilisti, muhihakalalele wintakiwa wa ekopo yoomanani. Mukwankhwaarini wa enowa enoophuwa evili; soowiimasaya sinookhala enowa yoowali ni ya wamwa oohapala.

³⁰Oohaawaxa anoophwanya mapuro ooca ni oothoiwa animwiixaatalela oolipeene. Vaheera Miyo kinoophwata mikwankhwarisanyu ni etala; eyo enoowiiva anamahalahalaanyu.

³¹Ii, mulako! Mulalamike! Ii, esidade! Mukhuwele! aFilisti ootheene nyuwosa, mutothowase. Anakhotto angweela mpatta wa ottuttuwani ni khawoworu a yaawo onghapuwa mmiseranimwawe.

³²Yoowaakhula heeni eneeraaya evahiwe anamitthenga a muloko owo? Yoowaakhula ti ela: “Yave ookhaliha oSiyoni ni mwemmo oohasuliwa a mulokwaawe anootthawelamo.”