Read Makhuwa-Shirima Yesaya 16 Bible Online

Yesaya 16 - Makhuwa-Shirima bible

Yesaya 16

¹Munrumihele namalamula a elapo iputtiputthi ntoko yooliva okhuma oSela, muvirihaka munikareni mpaka vamwaako wa Mwaana Muthiyana a oSiyoni.

²Asithiyana a oMowabe ari mmirorani sa wArenoni ari ntoko ipalame sivavaka soomoliweene mpuuruni.

³“Munivahe miruku; mulakele. Mpake munttuusaanyu ntoko ohiyu, hata okhalaka othana. Ngwiipithihe anamatthawa; muhiwoonelelihe yiipinthaayawo.

⁴Anamatthawa a oMowabe ekhaleke ni nyuwo; mukhaleke yoowaakihaaya wa namaphwata.” Namahasula onoomalihiwa, ophwatiwa onoomalatho. Namwiittana onkoongora mweelaponi.

⁵Ehice ya emwene enookhalihiwa moosivelani; moororomeleyani mulopwana onookilaathimo — mmoha a ekhapira ya Davide: Mphuki onaasaasa ekhaikhai aakuveyaka waakiha eri ya ekhaikhai.

⁶Nohiiwa sa wiixoona wa oMowabe — wiikuxawaya otokotoko, wiivuwihawaya wootheene, ni niveihonaya, mene sootheene iyo khasimuteko.

⁷Tivawo aMowabe aniinlaaya; anlalamikela vamoha oMowabe; olalamika ni othanana wa asilopwana a oKiri Hareseti.

⁸Imatta sa oHexeboni soonyaala ni hiihotho imatta sa iwuuva* sa oSibema. Anamalamula a miloko aanyikalela imatta sa iwuuva* sooreerelaxa, mwa seiye khalayi saaphiya mpaka oYazari ni mpatta wa munikareni. Iphandisaya saaphuwa siphiyaka ophareiya.

⁹Vano kiniinla ntoko oniinlaaya oYazari niwoko na imatta sa iwuuva* sa oSibema. Ii! Hexeboni, Ii! wEleyali, kinoonaanihani ni maithoraaka! Okhuwela wa ohakalala niwoko na soowiimasanyu ni ohephawanyu woomala.

¹⁰Ohakalala ni otteela murima woovenxiwa mmatta; khawoworu oniipa hata onkhuwela mmatta mwa iwuuva*; khawoworu onaama iwuuva* mmattankhini, niwoko koomaliha okhuwelawaya wa ohakalala.

¹¹Murimaaka onlalamikela oMowabe ntoko makita ni okumaaka onghihimerela oKiri Hareseti.

¹²oMowabe wiixooniheraka mmattumuxanimwaya ootteeliheriwa miluku sikina; onimwiikhulumula paahi; waavolowaka vanipuroniwaya nootteela weera ovekele, khoowera etthu.

¹³Ti ala masu Yave aahimmaawe mwaha wa oMowabe.

¹⁴Vaheera vano Yave oneera: “Muyaakhani tthaaru paahi ovuwa wa oMowabe ni amakaaya ancipale ootheene anooramusiwa ni anamahalahalaaya anookhala vakhaani ni oohilipa.”