Read Makhuwa-Shirima Yesaya 18 Bible Online

Yesaya 18 - Makhuwa-Shirima bible

Yesaya 18

¹Ii! Onoohaawa weyo, elapo ya oruma wa aciitthu mukerekhere nyooloko sa oKuxe.

²Awosa anaarumiha anamitthenga ni makula matokotoko a etiili mphareiyani. Anamitthenga oowaakuveya, murowe wa muloko woorakamelaxa ni wa exapala yootteettheya, wa muloko woowooviwa ni ootheene ari vakhiviru ni ottai, muloko ontthunaxa owana, onuuluma nuulumo noovirikanaxa, mwa yoowo elapwaaya ekawanyeiye ni nyooloko.

³Miloko sootheene nyuwo sa elapo ya vathi; ootheene nyuwo mummaka mulaponimu, eneneero yeemexiwaka mmanyaakoni, munimoona, ni nipalapatta naarumaka, munimwiiwa.

⁴Yave onkeerela ha: “Vanipuroni kimankaaka kinoomaala, kiwehaka, ntoko oviha wa nsuwa nootutha, ntoko nihutte na nikame moovihani mwa ehuhu ya ohepha.”

⁵Vano ohinaaye ohepha, emalaka ephovo ni ithutu sithatuwaka soowiima owo onooseekela soophuwa; avenxaka iphandi soorakama.

⁶Ootheene yaawo animwinnyereriwa marepo ni axinama a ntuphini; ipalame sinookhuura mittembosaya elimwe yootheene ni axinama a ntuphini eyiitta yootheene.

⁷Ehuhuweene yeeyo Yave onoovahiwa samahala ni muloko woorakamelaxa ni wa exapala yootteettheya, muloko woowooviwa ni ootheene ari vakhiviru ni ottai, muloko ontthunaxa owana, onuuluma nuulumo noovirikanaxa, mwa yoowo elapwaaya ekawanyeiye ni nyooloko. Soovahasene seiyo sinooruuhiwa omwaako Siyoni, nipuro na Nsina na Yave a ikuru sootheene.