Read Makhuwa-Shirima Yesaya 19 Bible Online

Yesaya 19 - Makhuwa-Shirima bible

Yesaya 19

¹Masu mwaha wa wExipitu ti ala: “Moone, Yave oneetta munihutteni noowaakuveya ninrowa wExipitu. Miluku soolokottha sa wExipitu sinthukumela ohoolowawe ni mirima sa awExipitu simporora.

²Kinoongwanawaniha ngwExipitu ni ngwExipitu: khula mutthu onoongwanano munneiye, mwaattamana ni mwaattamanaawe, esidade ni esidade, omwene ni omwene.

³awExipitu anooporora ni Miyo kinoovirikanyiha soovaanelasaya; awosa anookohakoha miluku soowootha, minepa sa anamakhwa, yaale yaahera ihako ni yuuluma ni anamakhwa.

⁴Kinoowinnyerera awExipitu mmatatani mwa mutokweene oowuuma murima ni mwene oonanara murima onimwaanyaatula,” onghima Namalamula, Yave a ikuru sootheene.

⁵Maahi a mooloko anoowelela ni mukerekhere mooloko onimuumaxa.

⁶Mipope sinimunkha; nyooloko sa wExipitu sinoovukuwa mpaka wuuma. Ittheere ni etiili sinoonyaala.

⁷Mapuro ootheene a mukerekhere mooloko animuuma mpakatho ohelannaayawo ni ephareiya. Imatta soophatteiwa sootheene sa mukerekhere mooloko sinimuuma, sinoovavihiwa ni epheyo, silakaseyeke.

⁸Anamamesera anoottaandawula ni anoolalamika — ootheene amvonyera mameso mmoolokoni Nilu; yaale amvonyera itthavi mmaahini anooporora.

⁹Yaale amvara muteko ni eliinyu* yoorehereriwa anookhalano murima woohilipa. Anamatthava a nliinya nootteettheya anooporora.

¹⁰Maneethi ootheene anookhala oohitteene ni anamiteko ootheene anaakhela nlivo anookhala ooriipiweene murima.

¹¹Asitokweene a oZowaani ari alolo; anamalaka a miruku a Farawu* amvaha miruku soololo. Moota heeni mungweraanyu omweerela Farawu*: “Miyo namiruku, oohusera a mamwene a khalayi”?

¹²Vano anamirukwaanyu ari woowi? Awosa ewoonihereni ni yoosuweliheni yeeyo Yave a ikuru sootheene omvaanelelaawe wExipitu.

¹³Asitokweene a oZowaani aathatuwa alolo; ahooleli a oMemfesi ti oolokotthiwa. Mapwattapwattha a mahimwaaya aahapuxa wExipitu.

¹⁴Yave ohaasariha munepa wa opupurumiha; awosa amveveleiha wExipitu mwa sootheene ampakaaya, ntoko omveveleelaawe namuhapaliwa muxerexere wa marapheyowaawe.

¹⁵Kheewowo etthu wExipitu ongweraaya opaka — aani okhuma waamuru mpaka waametto; aani kancesa ni ettheere — kheewowo ongweraaya opaka.

¹⁶Vanihukuni nenenenno awExipitu anookhala ntoko asithiyana. Anoothukumela ni woova niwoko na moono wa Yave a ikuru sootheene aneeraawe aatheteele yaale.

¹⁷Vano elapo ya oYuda enimwaaruuhela awExipitu woova; ootheene eneera eromole nsina na oYuda, onoowuuma owanoni niwoko na yeeyo Yave a ikuru sootheene aavaanelenlaawe yaawo.

¹⁸Vanihukuni nenenenno isidade ithanu sa wExipitu sinimuuluma nuulumo na oKanaani simukhalelaka nthiti Yave a ikuru sootheene. Emoha ya seiyo eniyitthaniwe Esidade ya Nsuwa.

¹⁹Vanihukuni nenenenno anookhala altaari* a Yave eriyari ya elapo ya wExipitu ni ecaambulo yoowuupuxera wa Yave mmwiinanonimwaya.

²⁰Eyo eniikhale eneneero ni namoona wa Yave a ikuru sootheene mweelaponi ya wExipitu. Awosa yaamukhuwelelaka Yave niwoko na anamahasulaaya, Owo onimwaarumihela Mvuluxa ni Namwaakiha ni Owo onoowoopola.

²¹Vano Yave onimwiisuweliha wa awExipitu ni vanihukuni nenenenno awosa anoosuwela weera Yave taani. Anoottottopela ni sooveleela sa axinama ni etrigu, anoomuroromeliha Yave ni nlipelo, ekwaniheraka seiyo.

²²Yave onoovulaliha wExipitu ni nihooxo; onoomana alamiheke. Awosa anoohokoleela wa Yave ni Owo onimwaakhula soodyoonttelelasaya, aalamiheke.

²³Vanihukuni nenenenno onuukhale musewe mutokotoko okhuma wExipitu mpaka wAsiriya. awAsiriya anoorowa wExipitu ni awExipitu wAsiriya. Vano awExipitu ni awAsiriya anoolapa vamoha.

²⁴Vanihukuni nenenenno oYixrayeli onuukhale namwiiraanyiha eriyari ya wExipitu ni wAsiriya — nreeliho na mweelaponi ya vathi.

²⁵Yave a ikuru sootheene onooreeliha ilapo iya eeraka: “Ooreelihiwa ekhale awExipitu, mulokwaaka, awAsiriya kaapattunxaaka ni aYixrayeli yoohiyeraaka.”