Read Makhuwa-Shirima Yesaya 23 Bible Online

Yesaya 23 - Makhuwa-Shirima bible

Yesaya 23

¹Masu mwaha wa oTiro ti ala: Ii!, makula matokotoko a oTaresisi, mwiinle! Niwoko oTiro woophwatiwa kheehanleru empa naari muxelo. Mutthenga ola orweenle oKipro:

²Nyuwosa amaki a ecirumba ni nyuwosa ananakoso a oSidoni munthadyirela mwa yaale anlapuwa ephareiya, mmaaleke!

³Mphareiyani etokotoko enrweela etrigu ya oXihori; ohepha wa Nilu ti musurukhwaaya ni oTiro woothatuwa emerekadu ya miloko.

⁴Wuulihiheye muru, Sidoni, ni nyuwo, nipuro noolipaxa na ephareiya, niwoko ephareiya yeenre: “Nkivilenle ovoreya wa oyara naari nkiyanre; nkaahungwe anamwane asilopwana hata asithiyana.”

⁵Ehabari yaaphiyakaru wExipitu, anoothananela ihaali sa oTiro.

⁶Mulapuwele oTaresisi, mwiinle nyuwosa amaki a ecirumba.

⁷Ela ti esidade yootthapa, esidade ya khalayi, mwa yeeyo inaawosaya saaronghale woowinani ilapo sa ottai?

⁸Taani aavaanelenle yeeyo oTiro? Ti oTiro ontthuka icireemba ni ananakoswaaya ari maneethi ni anamarondaaya ti oosuwanyeyaxa mweelaponi ya vathi!

⁹Ti Yave a anakhotto omvaanelela yeeyo weera aphwate wiixoona wa ovuwa wootheene ni aayevihe atthu ootheene arino epili mulaponi.

¹⁰Ii! Mwaana muthiyana a oTaresisi, mulime mulaponimwanyu ntoko ompakiwaaya muxerexere Nilu, muxelowaanyu khoowowo.

¹¹Yave ootheteela ntata mphareiyani anathukumeliha imwenesaya. Mwaha wa oFenisiya oolamulela weera mapurowaaya oolipihiwaxa ephwatiweke.

¹²Owo eenre: “Ii! Mwaamwali oowiikosoopa a oSidoni vano moovonyeriwa vathi. Mvenye, mulapuwe ephareiya mpaka oKipro; hata wuuwu iwo khamwiitthuuwawo.”

¹³Moone elapo ya oBabiloniya; owo ti muloko olakaseiye. awAsiriya aatatuxa elapo eyo okhala ya axinama a munikareni. Aaweliha itooresaya* sa orica; aahuhula mapurowaaya oolipihiwaxa enatatuxa milepe.

¹⁴Ii!, makula matokotoko a oTaresisi, mwiinle! Nipuronanyu noolipihiwaxa noophwatiwa.

¹⁵Ehuhuweene yeeyo oTiro onoottiwaliwa wa iyaakha miloko mithannamiili; eyo tiiyo ehuhu ya okumi wa mwene mmoha. Mene simanleene iyaakha miloko mithannamiili iyo, enookhumelela oTiro yeeyo enghimmwa muciponi mwa Puuta:

¹⁶“Ii! Puuta oottiwaliwa, munkuxe makita, mviravirihe musidade. Mmwiipe makita nnenesene, mwiipe icipo sincipale weera muupuweleliwe nyuwo.”

¹⁷Simanleene iyaakha miloko mithannamiili, Yave onimuupuwelela oTiro. Owo onoohokoleela wa mutekwaawe wa opuuta araruwaka ni omwene wootheene wa elapo ya vathi.

¹⁸Wa soothesene, ewinelo ya othumihawawe enookhala ya Yave. Ewinelowaawe anoovahiwa yaale ankhala vamaithoni wa Yave, wa sooca soowaatta ni ikuwo sooreera.