Read Makhuwa-Shirima Yesaya 27 Bible Online

Yesaya 27 - Makhuwa-Shirima bible

Yesaya 27

¹Nihuku nenenenno Yave onoottaruxa ni ekatanaawe, ekatanaawe yoowoopiha, etokotoko ni yooweraxa, Levitiyani*, enowa eniipurula, Levitiyani*, enowa yoowiipirikixa. Yave onimwiiva enowa yoowoopiha eyo ya mphareiya.

²Nihuku nenenenno onimweeriwa: “Mwiipele ematta ya iwuuva* soowiimaxa.

³Miyo, Yave, ti namakosoopaaya; kinghelela maahi khula nihuku; kinlipelela ohiyu ni othana weera ahikhale anaananarihe ematta eyo.

⁴Nkinyoonyiwa. Rupulula ni nyiiwa sakixupa, kinimwaattamela seiyo weera kiphwate ni mooro.

⁵Waahikhala hiiho, awosa erweeke weera etthawele wa Miyo; awosa epakeke murettele ni Miyo; aani epakeke murettele ni Miyo.”

⁶Mmahukuni a muhoolo, Yakobe onookhala ni mikwankhwaari ni oYixrayeli onoottuva ithutu, osarihaka elapo yootheene ni soowiima.

⁷Apaale Yave oomvulaliha ntoko yaale yaamvulalinghe? Apaale ohiiviwa ntoko yiiviwaaya yaale yaamvulalinghe?

⁸Nyuwo munimuthoriha yoowo mukhottoni mmoomolelaka ottai. Owo onoomola muloko ni iphumusawe sooweraxa ntoko munihukuni na epheyo etokotoko ya ninkhuma nsuwa.

⁹Hiiho nthowa na Yakobe nnoomalihiwa ni soowiima sookwanela sa ovenxiwa wa sootthekasawe nsikhale ha: owo aapwexa altaari* a maluku ootheene mpaka othatuwa ntthupi khasihala nyiri soothipeleliwa Axera, hata altaari* a erubani*.

¹⁰Esidade yoolipihiwaxa yoothaamiwa; yoohimakiwa ni yoottiwaliwa ntoko nikare. Weiwo imombe ixaana sincaayawo sinakona ni simvurula makukhu a iphandisaya.

¹¹Iphandisaya suumaka ni saavasuwaka, asithiyana anootetheera. Vano muloko owo ti woohiiwexexa; tivawo Yoole aapanke ohinaamorelaawe ikharari; Mpattuxaaya khanoonihera murima wooreera.

¹²Nihuku nenenenno Yave onoottottattotta iphandisaya okhuma wEfrates mpaka nxaapwa na wExipitu, ni nyuwosa anamwane a Yixrayeli munoothukumanyihiwa mmoha mmoha.

¹³Nihuku nenenennotho ninooruma nipalapatta ntokotoko. Yaale yaariheenle wAsiriya ni yaale yaatthukingwe, eronghiwaka wExipitu animoowa weera emulape Yave vamwaako wootteela oYerusaleemu.