Read Makhuwa-Shirima Yesaya 29 Bible Online

Yesaya 29 - Makhuwa-Shirima bible

Yesaya 29

¹Ii! Wa nyuwo, wAriyeli, wAriyeli, esidade aakonenlaawe Davide! Khula eyaakha mumpwaherera ni ifestasanyu.

²Hata hiiho kinoorica wAriyeli; eyo enimwiinla ni enoolalamika; eniikhale wa Miyo ntoko ttukuttha a altaari*.

³Kinoorica moota woomalela; kinimoorukureerihani ni itoore* soorica kirehereraka soowelelano exiraanyu.

⁴Mukurumungweene, munimuuluma vatthayani; nsunanyu noohiiwanyeya nniiwiwe muntthupini. Nsunanyu nnikhume vatthayani ettuusittuuseene; nnikhale ntoko waapa woorweela muntthupini.

⁵Vaheera amwiittanaanyu ancipale anoothatuwa ntoko ntthupi nootteettheya; nakupa a anamapuhera ntoko makamba amvavihiwa ni epheyo. Eyo eniyeereiye woowaakuveya, wootutuxereya,

⁶Yave a ikuru sootheene onimoowa mutarini, motetereyani ni moorumani otokotoko; muyuupuruni ni mutthekuni ni mmalumini a mooro woolaliha.

⁷Miloko sincipalexa soowanano wAriyeli; seiyo singwanano wAriyeli sirweelaka ni siricaka nipuronaya noolipaxa, nsikhale ntoko yeeyo eneereya moolohani ni mmooneloni wa ohiyu.

⁸Eniikhale ntoko mulopwana oovoliwa etala onloha acaaka, mene aavenyaka, omphwanya avoliweene etala; ntoko mulopwana oovoliwa ntthona onloha awuraka, mene aavenyaka oohilipa omphwanya vammilo omuumaleene. Nsikhale hiiho ni miloko sincipale sineeraaya siwaneno mwaako Siyoni.

⁹Owuumeeni owanoni ni mutikhiniheye; mwiipake oohoona mpwaherere ohoona; mukhaleke oohapaliwa muhiwunre; mumveveleya muhiwunre yoohapala.

¹⁰Yave ohootannyerani okonaxa; Owo oophuta maitho a maprofeeti; Owo ookuttelela nyuru sa anamoonihera*

¹¹Wa nyuwosa eyoonihero ela yootheene ti masu oowaleliwa mulivuruni paahi. Vano nyuwo mwamvaha elivuru ela mukina ongwera osoma, mmweerelaka: “Dyoontte, musomeke,” owo onoowaakhulani: “Nkingwera, niwoko yoowaleliwa.”

¹²Naari mwamvaha elivuru ela mukina ohingwera osoma, mmweerelaka: “Dyoontte, musomeke,” owo onoowaakhulani: “Nkingwera osoma.”

¹³Yave oneera: “Muloko ola onkaattamela ni masu ni onkittittimiha ni iyano paahi, vaheera mirimasaya siri ottaiwaka. Onkilapa ni ekhovelelo ya atthu paahi.

¹⁴Tivawo, kineeraaka kitikhinihetho muloko ola ni sootikhiniha sincipale; miruku sa anamiruku sinooriheya; owalaala wa oocendyeraaya onkoongora.”

¹⁵Ii! Wa yaale amvara muteko muxiirini emwiipithihaka Yave soovaanelasaya; yaale amvaanela soonyeengasaya mpiphini, yiixeerelaka: “Onkoona taani? Onsuwela taani yeela?”

¹⁶Nyuwosa mumvirikanyiha itthu. Ori ntoko wuupuwela weera namoopa a nyaapu onlikana ni oloko. Apaale yeeyo yoopakiwa enoomweerela namapakaaya: “Owo khakipanke”? Apaale mwaapu onoowera omweerela namoopa a nyaapu: “Owo khasuwenle etthu”?

¹⁷Woowaakuveya oLibanu onootatuxiwa elapo ya ethaadyira ni elapo eyo enoolikana ni othako.

¹⁸Nihuku nenenenno atthu oohiiwa animwiiwa masu a elivuru, ni mpiphini ni mmunttuusini maitho a atthu oohoona animoona.

¹⁹Emaara ekinatho atthu oowiiyeviha anoomuhakalalela Yave; atthu oohaawa anoomuhakalalela Ootteela a oYixrayeli.

²⁰Anamapuhera ankoongora ni hiihotho anamatthebwa; ootheene antthunaxa sootakhala anoomalamalihiwa,

²¹yaale animutatuxa nanthowa ohikhalano nthowa ni nsu nimoha paahi; onuulummwa milattu animvirikanyihela namwaakiha, ekhalelaka onamoona woowootha, ehiihaka hiiho weera ehooneye ekhaikhai.

²²Tivawo Yave omooponle Abrahaamu eerenlaawe ekhapira ya Yakobe: “Ekhapira ya Yakobe kheeyevihiwatho, hata ekhovaaya khayaamoratho.

²³Awosa yaawoonaka anamwanaaya eriyaraaya — muteko wa matataaka — vano anoolaleiya Nsinanaka ntoko Nootteela; awosa animwaakhulela weera Muluku a Yakobe ti Ootteela ni anoopwaherera emuttittimihaka Muluku a oYixrayeli.

²⁴Yaale anghapuwa mmunepani anookhalano wiiwexexa ni anamattaandawula animwaakhulela oxuttihiwa.”