Read Makhuwa-Shirima Yesaya 30 Bible Online

Yesaya 30 - Makhuwa-Shirima bible

Yesaya 30

¹“Ii! Wa anamwane oottiyamaaru,” onghima Yave, “Ii! Wa yaale ankwanihera soowuupuwela sihinrweela wa Miyo; yaale aniiwanana kihaakhulenle, yaandyeereraka sootthekasaya.

²Ii! Wa yaale anrowa wExipitu ehikikoherenre; yaale anuupuwela weera waakiha wa Farawu* onimwaakhavihera ni munttuusi wa wExipitu onimwaavaha nipuro noolipaxa.

³Vaheera waakiha wa Farawu* onoowuulihihani muru; munttuusi wa wExipitu onimooyevihihani.

⁴Naari asitokoweenaaya erowaka oZowaani ni anamitthengaaya ephiyaka oHanesi,

⁵ootheene animuulihiheya muru niwoko na muloko ohinaavareleya muteko; muloko ohinruuha ekhavihero hata onnene, mene wuulihihaxa muru paahi.”

⁶Masu mwaha wa axinama a oNegeba: Abuurwaaya ni ikamelusaya silemeliweene mihakhu, anarumiha simviravira mweelaponi yoosareya ohaawa ni ovalavela, yoosareya amwatto alopwana ni athiyana, yoosareya ivili ni inowa soowali, erowaka wa mulokweene yoowo woohimuteko.

⁷Awosa anrowa wExipitu ori woohimutekoxa. Tivawo kinttehaaka Rahabi ohimuteko.

⁸Murowe vaanaanova, mwaalepele vatthaabwani; mwaalepele mulivuruni weera eyo ekhale namoona oohimala wa mahuku a muhoolo.

⁹Muloko owo ti woovaanya, anamwane oowootha, anamwane ahintthuna wiiwelela ikano sa Yave.

¹⁰Awosa aniweerela anamoonihera*: “Muhikhalenotho moonelo!” ni wa maprofeeti: “Muhinooniheretho yeeyo eri ya ekhaikhai! Munithalihere masu oosiveliha, muhime iyoonihero soolokottha.

¹¹Muhiye ephiro eyo; musembe musewe owo; mmaaleke onoopopiha ni Ootteela a oYixrayeli.”

¹²Tivawo, Ootteela a oYixrayeli oneeraawe: “Mweenre mukhootta mutthenga ola muroromelaka nihasu ni sootakhala,

¹³yoottheka ela enoothatuwa wa nyuwosa ntoko exiri yoorakamelaxa ehinaaye omora, enimwaaleya, enookhutubuwa, mwa yeeyo eneera emore wootutuxereya.

¹⁴Eyo enoopwexakaseya ntoko nivali; yoopwexiwa moota wooweera variyari wa mipattasaya khanimphwanyeyaru nivali noovalela mooro naari orikela maahi.”

¹⁵Muluku onlamula sootheene, Ootteela a oYixrayeli oneera ha: “Ovuluxiwawanyu ori moorukunxani murima ni ngwiitthuuwani; ikurusanyu sirimoomalani ni moororomelani, vaheera nyuwosa khamutthunne.

¹⁶Nyuwosa mweenre: ‘Hoye, nnootthawa ni ikavalu*.’ Vano munootthawa! ‘Nnimweettiha ikavalu* soowaakuveyaxa.’ Vano anamattharelelaanyu ti eneera yaakuve ophiya.

¹⁷Atthu macira muloko anootthawa woopiha wa mutthu mmoha ni niwoko na woopihiwa wa atthu athanu, ootheene nyuwosa munootthawa mpaka muneeraanyu mwahiiwe ntoko eneneero vamwaako, ntoko ecaambulo vanttumuxani.”

¹⁸Hata hiiho Yave ontthunaxa woomorelani ikharari. Owo onoovenya weera awoonihereni murima wooreera. Vano Yave ti Muluku a ekhaikhai. Ooreelihiwa ootheene yaale aningweherera Yoowo!

¹⁹Ii! Muloko wa oSiyoni ommaka oYerusaleemu, nyuwosa khamwiinlatho. Moota owo aneeraawe awoonihereni onnene nyuwosa mwaamukhuwelelaka ekhavihero! Owo iiwaru, onoowaakhulani.

²⁰Naari Yave oovahakani yooca ya omwiittana ni maahi a ohaawa, ahusihaanyu khayiivithatho; nyuwosa munoowoona ni maithwaanyu.

²¹Naari mwaahapuwelaka moono woolopwana hoye hoye woothiyana, maaruwaanyu animwiiwa nsu ottuliwanyu neeraka: “Ephiro ti ela, mutthare.”

²²Vanonto munooveiha milukusanyu soolokottha soohuruweliwa eparatha* ni icaambulosanyu soohuruweliwa eyuuma yoorikaxa; munoovonyera vaate ntoko nttapwatta noonanara mweerelaka: “Khuma!”

²³Owo onimooruuhelanitho epula wa mmiso muneeraanyu mwaale ni etthaya enooruwera yooca yoowaatta. Vanihukuni nenenenno mihuwosanyu sinimooca moowaatta.

²⁴Imombe ni abuuru aamvareliwa muteko olima animooca malaxi ni maakha oowuutuwanyeriwa ni ekhope ni ehipa.

²⁵Mmanyaakoni ni mmareyareyani oorakamela ootheene eniyeereiyeke ereenemo maahi, munihukuni nno na noomala, saapittuwaka itoore*.

²⁶Mweeri onimwaara ntoko nsuwa ni nsuwa nnimoopaxa woopwexerereya mahuku mathannameeli, Yave aarehereraka soovulalihiwa sa mulokwaawe ni aalamihaka makhwatta Owo aatannyenraawe.

²⁷Moone, Nsina na Yave ninrweela ottaiwene, isarasawe sivarelaka ni mahutte ooriipihana a mwiixi; iyanosawe soosareya isara ni nluminawe ti mooro woolaliha.

²⁸Iphumusawe siri ntoko miipiili ammireiha mpaka muxiko. Owo omveera miloko mutheloni ya ophwata; Owo omvolongha mmwaano mwa miloko etthu eneettiheriwa mwa yeeyo enghapuxa.

²⁹Nyuwo munimwiipa ntoko muniipelaanyu ohiyu wa efesta yootteela; mirimasanyu sinoohakalala ntoko muloko woomwiiwa mpetta, owelaka mwaako wa Yave, Mwala wa oYixrayeli.

³⁰Yave onimwiiwiha nsunawe noovuwaxa ni onimoonihera ikuru sa moonowaawe woowoopopiha. Onimoonihera onyoonyiwawawe mmalumini a mooro woolaliha, eriyari ya epheyo etokotoko, etari ni maralala.

³¹Nsu na Yave nnoophwata wAsiriya; Owo onoomaliha ni ekopwaawe ya emwene.

³²Omana wootheene Yave aneeraawe aphwanyihe wAsiriya ni ekopwaawe yoottaruxa onootthareleya murumani wa ecipo ya ikoma ni amakita, Owo awanaka ni nyoonosawe soowera.

³³oTopeti woorehereriwa khalayi; ooreherereliwawo mwene. Moorowaaya ti woowaattaxa ni mutokotoko, okukumaka. Iphumu sa Yave simpatta ntoko enxofre* evarelaka mooro.