Read Makhuwa-Shirima Yesaya 31 Bible Online

Yesaya 31 - Makhuwa-Shirima bible

Yesaya 31

¹Ii wa yaale anrowa wExipitu yaasaasaka ekhavihero; yaale anroromela ikavalu* ni ikaarosaya soowaatta, anroromela mwa ikuru sa anamweettihaaya, mene khaaningweha Ootteela a oYixrayeli naari khaanaasaasa ekhavihero enrweela wa Yave.

²Wa soothesene, Yave ti a mirukutho ni ongwera oruuhela erisa; Owo khanceendya maswaawe. Owo onoovenyera impa sa anamariheya, aawananakano yaale anaakhavihera anamapaka a soonanara.

³awExipitu ti atthu, khaahiyono Muluku ni ikavalusaya* ti sa erutthu, khasihiyono munepa. Yave aatheteyaka ntata, vano yoole onkhavihera onookwakwathuwa ni yoole onkhaviheriwa onoomora — ooweeli anooriheya.

⁴Yeeyo Yave onkeerelawe ti ela: “Hiiho ntoko mwatto mutokotoko onoopelaawe murika, mukhwipi yoovaraawe onamurica mukuttula wa akukhuli, owo khanoova okhuwelawaya, hiihotho Yave a anakhotto onookhuruwa weera awane vamwaako Siyoni ni mmattumuxanimwaya.

⁵Hiiho ntoko ipalame sinaakhapelelaaya axaanaaya ni mapuphaaya, Yave a anakhotto onimwaakiha oYerusaleemu; Owo onimwaakiha ni onoovuluxa; Owo onoovira osuluwaya, amoopoleke yoowo.”

⁶Ii! aYixrayeli, munghokoleele Yoowo mwaamvaanyaxiyaanyu.

⁷Vano vanihukuni nenenenno ootheene nyuwosa munookhootta miluku soolokottha sa eparatha* ni eyuuma yoorikaxa soopakiwa ni matataanyu a onamattheka.

⁸wAsiriya onoomora mwa ekatana ehikhanle ya mutthu; ekatana ehikhanle ya anamakhwa enoomuhonona yoowo. Awosa anootthawa ekatana ni amiravowaaya anoovarihiwa miteko sooviha.

⁹Nipuronaya noolipaxa nnoomora niwoko na woova; asitokweenaaya yoonaka eneneero ya ekhotto, anoorukureereya nyuru,” onghima Yave, mwa Yoowo moorowaawe onkhala oSiyoni, niikhonawe ninkhala oYerusaleemu.