Read Makhuwa-Shirima Yesaya 33 Bible Online

Yesaya 33 - Makhuwa-Shirima bible

Yesaya 33

¹Ii! Wa nyuwo, namaphwata, nyuwo muhaakumve ophwatiwa. Ii! Wa nyuwo namavariha, nyuwo muhaakumve ovarihiwa! Nyuwo mwaamalihaka ophwata, munoophwatiwa; mwaamalihaka ovariha, munoovarihiwa.

²Ii! Yave, munoonihere murimaanyu wooreera; hiyo nnoohaawelani Nuwo. Mukhaleke ikurusahu khula oxeexelo, ovuluxiwawahu mweehuhuni yoowoopiha.

³Moorumani mwa nsunanyu miloko sinootthawa; Nyuwo mwaavenyaka, iyo sinoomwareya.

⁴Ii! Miloko, sinoothukumanyiheya soohuhulasanyu ntoko onthukumanaawe nasope, sinimwiivonyera mwa soohuhula ntoko nakupa a misoope.

⁵Yavetho oovuwihiwa, Owo onkhala osulusulu; Owo onoosariha oSiyoni ekhaikhai ni ororomeleya.

⁶Owo onookhala mathipelo oolipeene wa ehuhuwaanyu, mihakhu sitokotoko sa ovuluxiwa, miruku ni osuwela; omoova Yave ti exaavi ya mirukusene seiyo.

⁷Moone, asilopwanaaya ookhomaalaxa ankhuwela mmuseweni; anamarumihiwa a murettele aniinlaxa.

⁸Misewe sitokotoko soohiiwa; khaawowo amviramo; woonanariheya wiiraana, anamoonaaya aaramusiwa; khoonttittimihaniwa.

⁹Elapo yohuumelela ni yookotakota; oLibanu onnyaala woowuulihiheyeene muru; oXaroni onlikana wAraba ni oBaxani ni oKaremeli woomora makukhu.

¹⁰Yave oneera: “Kinoovenya vaanaanova; vano kinoovuwihiwa; kinoottittimihiwa vaanaanova.”

¹¹Nyuwosa munrupala makamba, munayara malaxi; iphumusanyu ti mooro onoohisani.

¹²Miloko sinoohisiwa ntoko empakeliwaaya ekaali*; sinoovonyeriwa vayikho ntoko nyiiwa soothikilasiwa.

¹³Nyuwosa muri ottai, mwiiwe yeeyo kipankaaka; nyuwosa muri vakhiviru, mwaakhele ikurusaka!

¹⁴Anamattheka oSiyoni aatteenguwa; yaale ahikhalanne Muluku aanthukumela yeeraka: “Taani a hiyo ongwera opwaherera ni okumi mmooroni woohisa? Taani a hiyo ongwera opwaherera ni okumi mmalumini oohimala?”

¹⁵Yoole oneetta moota woororomeleya ni onuuluma ekhaikhai, yoole onkhootta ewinelo yoohiroromeleya ohinaakhela makhwankwa, yoole ohintthuna wiiwa soovaanela sa anamwiiva, akhoottaka woona soonanara.

¹⁶Ti yoole mulopwana aneera akhale musulusulu ni wootthawelawawe onuukhale mwaako. Onookhalano yooca ni maahi kheemuthowa.

¹⁷Maithwaanyu anoomoona mwene ngwaaranimwawe, yoonaka wunnuwa wa elapo yootheene.

¹⁸Mmuupuwelonimwanyu munimuupuwelela soowoopiha sa khalayi: “Ori woowi mutokweene ole? Ori woowi aalikela aakhelelaka musurukhu? Ori woowi mutokweene a itoore*?”

¹⁹Khamoonatho muloko ole woowiixoona; mulokweene yoowo ni nuulumo noohiiweya, noorikaxa ni noohiiwexexeya.

²⁰Moone oSiyoni, esidade ya ifestasahu; maithwaanyu animoona oYerusaleemu, woomaka wa murettele, eheema eneera ehivenxiwe; ikhomosaya khasirwa sipheliwa naari mikhoyisaya khasipasiwaru.

²¹Weiwo Yave onookhala Mulukwaahu a ikuru sootheene; Nniikhale ntoko nipuro nrino nyooloko ni mirora soothanuwa. Khanivirarumo nikula ni itthaabwa sineettiheriwa naari nikula ntokotoko.

²²Vano Yave ti Mphukaahu onnilamula. Yave ti Mwenaahu; ti Yoowo aneera anivuluxe.

²³Mikhoyisaya sooxekexeya, nrimbunaya nikula ntokotoko nooxekexeya, mitthambo khasithapurungwe. Vano sinookawaniwa soohuhula soowaattaxa ni mpakatho atthu ooheetta anookuxa soohuhula.

²⁴Khawoworu mmaki a oSiyoni aneera eere: “Kinoovoreiwa” ni soottheka sa yaale amankewo sinooleveleliwa.