Read Makhuwa-Shirima Yesaya 34 Bible Online

Yesaya 34 - Makhuwa-Shirima bible

Yesaya 34

¹Murweeke, nyuwosa miloko ni mwiiwe, mwiiwe nnenesene miloko nyuwosa! Elapo yiiwe ni sootheene sirimo; elapo ya vathi ni sooruwerasaya!

²Yave oonyoonyeriwa miloko sootheene; isarasawe siri vasulu wa anakhottwaaya ootheene. Owo onimwaaphwata moota woomalela; Owo onimwinnyerera mookhwaani.

³Anamakhwaaya anoovonyeriwa vaate; mittembosaya sinimunkhaxa; nyaako sinoosareya ephomaaya.

⁴Ithenyeeri sa wiirimu sinoolakaseya ni irimu sinoovitikeya ntoko buukhu a khalayi; anakhotto ootheene a wiirimu anoomora ntoko makukhu oowuuma a evideira* ni a efiigu.

⁵Ekatanaaka emalihaleene mutekwaaya wiirimu; moone, vano musuwele weera eyo enookhuruwela othoriha wEdomi, muloko owo kithorihenlaaka ophwata.

⁶Ekatana ya Yave yoosareya ephome; yoohuruweleya makhura — ephome ya iputtiputthi ni ipuri, makhura a miso sa anapunci. Vano Yave onnyesereriha yooveleela oBozera, noomala mweelaponi mwa wEdomi.

⁷Inari sinoomora vamoha ni aximombe ni imombe ilopwana. Elapwaaya enoosareya ephome ni ntthupi nnoosareya makhura.

⁸Vano Yave ookhalano nihukunawe na nthorihelo, eyaakha ya ikuhu weera aakihe mulattu wa oSiyoni.

⁹Nyooloko sa wEdomi sinoothatuwa nnyoma; ntthupinaya nnoothatuwa enxofre* evarelaka; elapwaaya enoothatuwa nttoko.

¹⁰Kheecipihiwa ohiyu naari othana; mwiixaaya khoohiyerera otthuwela. Wa ikhapira sootheene sinoohala mathalaru; khaawo aneera avirewo.

¹¹Esiisi ya munikareni ni namame onookuxa elapo eyo; esiisi etokweene ni nakhuku anoopakamo ipuurusaya. Muluku onimookolela wEdomi efiiyu yooringelano ya ophwata ni efiiyu yoowookolela ya mathala.

¹²Maneethaaya kheekhalanowo etthu eniitthaniwa omwenaaya. Anamwane a mwenaaya ootheene ankoongora.

¹³Nyiiwa sinookhuneela isidadesaya soolipaxa, aani rupulula ni nyiiwa mapurowaaya oolipihiwaxa. Nno nnoothatuwa nipuro ankhalaayawo akhwatte ni isiisi.

¹⁴Soopattuxiwa sa munikareni sinimwaakumanano akusupa, ni ikhomaci sinimwiitthanana. Iwotho sinimwiitthuuwawo sooweetta ohiyu ni sinoophwanyamo nipuro nookhala.

¹⁵Mwemmo esiisi enoopakamo epuuruwaaya, enoorelamo moocaaya; enootothola yaakosoopaka axaanaaya mmunttuusini mwa mapuphaaya. Weiwo axaaka anoothukumanatho eeli-eeli.

¹⁶Ngwehe mulivuruni mwa Yave ni musome: Soopattuxiwa sootheene iyo sinookhalawo, khaawo anaakhale meekhaawe. Vano ti eyanowaawe elamulenle ni Munepaawe onimwaathukumanyiha.

¹⁷Owo onimwaakawela mapuro ootheene; ntatanawe nnookawa mmiringoni; seiyo sinookuxa wa mahuku ootheene sikhalakawo ikhapira ikhapirasene.