Read Makhuwa-Shirima Yesaya 35 Bible Online

Yesaya 35 - Makhuwa-Shirima bible

Yesaya 35

¹Nikare ni elapo yoowuumelela enoohakalala; nikare nnoohakalala nittuvaka ntoko ethutu yoothapuruwa.

²Sinoottuva ithutu; sinoohakalala vancipale sikhuwelaka ni murima wootteela. Nnoovahiwa ovuwa wa oLibanu ni mpaka waara wa oKaremeli ni oXaroni. Weiwo Yave onimoonihera ovuwawawe ni waara wa Mulukwaahu.

³Mulipihe nyoono sookhulumuwa; mulipihe makutha ootteenguwa.

⁴Mwaaleele yaale amporora: “Mukhaleke oolipeene, muhoove; Mulukwaanyu onimoowa, onimoowa ni ikuhu, ni ottaruxiwa wa wiirimu; Owo onimoowa weera oovuluxeni.”

⁵Vano maitho a oohoona anoohuleya ni maaru a oohiiwa animwiiwa.

⁶Vano atthu ooheetta anootupha ntoko naahe ni nlumi na mutthu oohuuluma nnimwiipa ni ohakalala. Maahi anoopiluwa munikareni, aani nyooloko mweelaponi yoowuumelela.

⁷Ehaava yoovihaxa enoothatuwa nratta; etthaya yoovoliwa ntthona enoothatuwa ihime soosareya maahi. Vanipuroni yaakhalaayawo akhwatte, vano onoophuwa munyepu, ettheere ni etiili.

⁸Ni musewe mutokotoko onookhalawo; onimwiitthaniwa Musewe Wootteela. Yaale oohitteela kheeviramo; onookhala wa yaale paahi aneettamo; alolo kheeviramo.

⁹Khakhalawo mwatto naari mwaamunama ooluwa. Khawoworu anaaphwanyaneyemo. Oovuluxiwa paahi eneera yeettemo,

¹⁰ni oowoopoliwa ni Yave anoohokolowa. Awosa anoovolowa oSiyoni yiipaka ni ohakalala. Ti ohakalala woohimala onuukhale icireembasaya. Ohakalala ni murima wootteela onimwaaphwanya ni murima wooriipa ni ohihimera onootthawa.