Read Makhuwa-Shirima Yesaya 41 Bible Online

Yesaya 41 - Makhuwa-Shirima bible

Yesaya 41

¹Nyuwosa icirumba, mmaaleke vamaithoniwaka! Miloko siphwanyetho ikurusaya! Seiyo sirweeke weera siixaakihe; nathukumaneke weera nuulume mulattu.

²Taani amutannyenre yoole onrweela ninkhuma nsuwa, amwiitthanaka weera amurumeele mweekhaikhaiyini? Owo ohinnyerera miloko wa yoowo ni onaalamulela mamwene weera emurumeele. Owo onaatatuxa ntthupi ni ekatanaawe, aani makamba ni muupaawe.

³Owo onaattharelela, anavira oolipeene mphironi inawosawe sihitonkwaaya oviramo.

⁴Taani opanke sootheene iyo? Taani okhalinghe ikhapira okhuma ompacereroni? Ti yoomi, Yave kiri oopacera ni ikhapira sookisera, saamalaka nlelo ti Yoomi kinookhala.

⁵Icirumba sohoona yeeyo, sinoova; ekotenle elapo ya vathi entetereya. Eyo enimwaattamela, erowaka ohoolo;

⁶khula mutthu onimukhavihera mukhwaawe, amweerelaka munneiye: “Mukhaleke oolipa murima!”

⁷Namaratta onnamulipiha murima namahana a eyuuma yoorikaxa ni yoole omvara muteko ni enyutto onnamulipiha murima yoole ommana eyuuma. Oonaka vannyomiheriwa oneera: “Ti wooreera.” Owo onlipiha muluku woolokottha ni misomaari weera ohimore.

⁸“Wa soothesene, nyuwo, Yixrayeli, murumeiyaaka, Yakobe kimuthanlalaaka, nyuwosa ekhapira ya Abrahaamu, nthamwenaaka,

⁹kookhumihaleni ekotenle elapo, mmapuroni oorakamelaxa koowiitthanani. Keenre: ‘Nyuwo murumeiyaaka.’ Kohoothanlani ni nkokhoontteni.

¹⁰Vano muhoove niwoko Miyo kiri ni nyuwo; muhitteenguwe niwoko Miyo ti Mulukwaanyu. Miyo kinimoolipihani ni kinimookhaviherani. Kinimoovarelani ni ntatanaka noolopwana noowina.

¹¹Ootheene anoothanyani vekhaikhai anooyevihiwa ni animuulihihiwa muru; yaale anoowananani kheeheleliwa, anooriheya.

¹²Naari ngwaasaasaka amwiittanaanyu khamwaaphwanya. Yaale anoowananani anoovukuliwa khuluwi.

¹³Niwoko Miyo ti Yave Mulukwaanyu kinoovarelani ntatananyu noolopwana kiweerelakani: Muhoove, Miyo kinimookhaviherani.

¹⁴Muhoove, muungu Yakobe, Ii! Yixrayeli mukhaani, niwoko Miyo muneenaaka kinimookhaviherani,” onghima Yave, Mvuluxaanyu, Ootteela a oYixrayeli.

¹⁵“Moone, kinimootatuxani maakina ookhurulela etthaya — manyowani ni arino maino a eyuuma. Nyuwo munookhurula nyaako ni munoottikittha mattumuxa mutatuxaka ntthupi.

¹⁶Munimwaaveera, epheyo enimwaakuxa ni ettheku enimwaarongha ottai. Vaheera nyuwo munoomuhakalalela Yave mumvuwihaka Ootteela a oYixrayeli.

¹⁷Oohaawa ni oothoiwa anaasa maahi, mene khaamphwanya; malumaaya ahuumiwa ntthona. Vaheera Miyo, Yave, kinoowaakhula; Miyo, Muluku a oYixrayeli nkaahiya.

¹⁸Kinoopakiha weera nyooloko sivire mmattumuxani oowuumaxa ni anaattuuttu anookhuma mmareyareyani. Kinootatuxa nikare maratta ni ilapo soowuumaxa anaattuuttu.

¹⁹Kinoophatteya munikareni nyiri sa esedari*, akaasiya*, murta* ni sooliveira*; kinoophatteya mmapuroni oowuumaxa nyiri sa esiprestu*, abetu* ni pinyeiru*,

²⁰weera atthu yoone ni esuwele, yuupuwele ni yiiwexexe weera ntata na Yave nipanke yeeyo ni weera Ootteela a oYixrayeli opattunxe.”

²¹Yave oneera: “Muulumeke mulattwaanyu.” Mwene a Yakobe oneera: “Muthalihere soowuupuwelasanyu.”

²²“Muruuheke milukusanyu soolokottha weera sinithalihere seiye sineera seereiye. Sinithalihere itthu sa khalayi weera noonelemo ni nisuwele ommaleloniwaya. Hoye hoye sinileele itthu sineera sikhumelele muhoolo,

²³sooniheraka itthu seiyo weera nisuwele weera iyo miluku. Sipake etthu — ekhalaka yooreera hoye hoye yoonanara — weera hiyo nithukumele ni nisareye woova.

²⁴Vaheera nyuwosa miluku soolokottha khamunteko ni mitekosanyu khasimvararu etthu; yoole onoothanlani ti a mwiikho.

²⁵Koomutannya mmoha okhuma mpatta wa ottuttuwani ni onimoowa; mmoha a ninkhuma nsuwa oniitthana Nsinanaka. Owo onaanyikalela anamalamula ntoko yaari kokotto, ntoko owo aari namoopa avottaka oloko.

²⁶Taani uulumme sa seiyo okhuma ompacereroni weera nisuwele hata sa seiyo khalayixa weera naakhuleleke: ‘Ole aahima ettiitthu’? Khawowo amoonihenre; khawowo amulaleenre, khaawo iiwaleru maswaanyu.

²⁷Miyo kaari oopacera othalihera yeeyo oSiyoni. Koomurihela oYerusaleemu namutthenga a ihaali sooreera.

²⁸Koomwaasa, mene nkimmoona mutthu — khawowo variyariwaya ongwera olaka, khawowo onkaakhula Miyo kaakohaka.

²⁹Moone, ootheene yaawo ti oolokottha. Mitekosaya khasimvararu etthu; icaambulosaya soohaniwa sinlikana iphumu ni etthu yoohimuteko.”