Read Makhuwa-Shirima Yesaya 42 Bible Online

Yesaya 42 - Makhuwa-Shirima bible

Yesaya 42

¹“Ola murumeiyaaka kinimukhaviheraaka; oothanliwaaka, mwa yoowo onkihakalaliha; mwa yoola kinoohela Munepaaka ni Owo onooruuhela miloko ekhaikhai.

²Owo khakhuwela naari khanyakula hata kharumiha mmiseweni.

³Owo khasinsa ettheere yoowinteya, naari khacipiha mutthambo ontthuwaxa. Owo onookwanihera ekhaikhai moororomeleyani.

⁴Owo khoonihera okhulumuwa naari khaporora mpaka aneeraawe akhalihe ekhaikhai mweelaponi. Icirumba sinoororomela munlamulonimwawe.”

⁵Muluku Yave ti Yoole opattunxe irimu ni aatanle seiye, Yoole otanunxe etthaya ni sootheene simmelamo, Yoole onaavaha ngwiya amakaaya ni okumi wa sootheene sinkhalamo. Vano, Mulukweene Yoowo oneera ha:

⁶“Miyo, Yave, koowiitthanani moororomeleyani; kinimoovarelani oolipeene. Kinimoothokororani kookhalihakani ntoko namwiiraanyiha a miloko ni waara wa amalapo,

⁷weera muhule maitho a oohoona, mwaatapuxe ootthukiwa mukaliposo ni ngwoopole yaale ankhala mpiphini.

⁸Miyo ti Yave — nna ti Nsinanaka! Nkirwa kimuvaha mukina ovuwawaka naari otthapelawaka wa miluku sikina.

⁹Moone, soohimmwa sa khalayi sookhumelela ni Miyo kinlaleiya inyowani; seiyo sihinaaye okhumelela, Miyo kinimoolaleerani.”

¹⁰Mmwiipele Yave ecipo enyowani, ottottopeleyawawe okhuma ekotenle elapo nyuwosa muneetta mphareiya ni sootheene siri mwemmo, nyuwosa icirumba ni sootheene sinkhalamo.

¹¹Nikare ni mittetthesaya sikhuweleke, mittetthe onkhalaawewo Kedari sihakalale. Amaki a oSela yiipeke ni ohakalala; awosa ekhuweleke vasulu nyaako!

¹²Awosa emuvuwihe Yave, elaleiyaka ottottopeleyawawe mucirumbani.

¹³Yave onoovenya ntoko mulopwana oowera, ntoko nakhotto ooweraxa onootannya nthitinawe; onimwaawina amwiittanaawe ni okhuwelela wa ekhotto.

¹⁴“Koomaala wa ehuhu yincipale, nkuulumaru, kiisuumaalihaka, mene vano kinkhuwela ntoko muthiyana ayaraka, kiniipulela, kinghihimera oohooxeyeene.

¹⁵Kinoophwata nyaako ni mattumuxa, kinimuumiha malaxaaya ni nyirisaya sootheene. Kinootatuxa nyooloko icirumba ni kinimuumiha maratta.

¹⁶Kinooweettiha oohoona mphironi ahisuwenlaaya; mphironi soohisuwanyeya kinooweettiha. Kinootatuxa epiphi waara ohoolowaya ni iphiro soothipeya kinoothatawaliha. Ti seiyo itthu kineeraaka kipake, ni Miyo nkaahiya.

¹⁷Vaheera yaale anroromela icaambulo ni aneerela seiyo: ‘Nyuwosa ti milukusahu’ animuulihiheyaxa muru.”

¹⁸“Mwiiwe nyuwosa oohiiwa; ngwehe nyuwosa oohoona ni moone!

¹⁹Oohoona taani ahikhanle murumeiyaaka ni oohiiwa ntoko namutthenga kimurumihalaaka? Oohoona taani ntoko yoole kitteeliheriwaaka, oohoona ntoko murumeiyi a Yave?

²⁰Nyuwo mohoona itthu sincipale, mene khampwantthe; maaruwaanyu aahuleya, mene khamwiiwaleru.”

²¹Yoomuhakalaliha Yave moororomeleyanimwawe opaka Nlamulonawe ntokotoko ni noovuwiheya.

²²Vaheera ola ti muloko woohuhuliwa ni woowiiyiwa, ophwanyingwe mmakhukuni ovithiweene mukaliposo. Owo woothatuwa yooviriwa ahikhalaka oowoopola; woopakihiwa yoohuhuliwa ahikhalaka ooweera: “Muhokoloxe.”

²³Taani a nyuwosa anaawiriyane hoye hoye apwatthe yeeyo mweehuhuni eneera erwe?

²⁴Taani amwinnyerenre Yakobe weera athatuwe yoohuhuliwa, ni oYixrayeli wa anamahuhula? Aari Yave mwa Yoowo hiyo naamutthekenlaahu, niwoko awosa khaatthunne otthara iphirosawe; awosa khayiiwelenle Nlamulonawe.

²⁵Tivawo aayeehenraawe oYixrayeli onyoonyiwawawe, eyo tiiyo nipuhero na ekhotto. Eyo yaarica ni malumi a mooro, hata hiiho khooxuttenre; eyo yaahisa, mene khawaapwatthenle.