Read Makhuwa-Shirima Yesaya 44 Bible Online

Yesaya 44 - Makhuwa-Shirima bible

Yesaya 44

¹“Vano Yakobe, murumeiyaaka, Yixrayeli kimuthanlalaaka, mwiiwe!

²Yave mwa Yoowo oopattunxeni ni oopankeni mmirimani mwa amayinyu, Yoowo onookhaviherani, oneera ha: Ii! Yakobe, murumeiyaaka, muhoove, Yexuruni kimuthanlalaaka.

³Niwoko kinooyeehera maahi mulaponi mwa ntthona ni nyooloko vatthayani yoowuumaxa. Kinooyeehera Munepaaka mukhapiranimwanyu ni mareelihowaaka mwa anamwaniinyu.

⁴Awosa anoophuwa ntoko munyepu, ntoko ixopu* mukerekhere nyooloko.

⁵Mmoha onimweera: ‘Miyo ti a Yave’ ni mukinatho onimwiitteha nsina na Yakobe ni mpaka mukinatho onoolepa mmatatanimwawe: ‘A Yave’ ni onimwiixiitthanela Yixrayeli.”

⁶“Vano, Yave, mwene ni Mvuluxa a oYixrayeli, Yave a ikuru sootheene oneera ha: Miyo ti Oopacera ni Ookisera, kihikhanle Miyo khawowo muluku mukina.

⁷Taani onlikana ni Miyo? Owo alaleiyeke yeeyo. Owo ahime ni athalihe ohoolowaka yeeyo yeereiye okhuma ehuhuweene yeele kaakhalinghaaka mulokwaaka wa khalayi ni seiyo nlelo sineera sikhumelele — aani owo atthomeke seiyo sineera seereye.

⁸Muhithukumele, hata muhoove. Khalayeene Miyo kaalaleiye yeeyo ni kaathalihera. Nyuwosa ti anamoonaaka. Khoowowo muluku mukina kihikhanle Miyo. Hoye! Khawowo Mwala mukina; nkimusuwenle hata mmoha.”

⁹Ootheene ampaka miluku sa icaambulo ari ethiru ni seiyo anttittimiheraaya khasimuteko. Yaale ankhalela onamoona seiyo ti oohoona, ehisuwelaka etthu mpakatho wuulihiheya muru.

¹⁰Taani ommoopa muluku ni onghana icaambulo sihinimukhavihera?

¹¹Owo ni asikhwaawe ootheene animuulihihiwa muru niwoko anamaratta ti atthu paahi. Ootheenaawo ethukumane ni yeemele vamoha; awosa anoovonyeriwa mootteenguwani ni ngwuulihani muru.

¹²Namahana onkuxa ekaruma anavarela muteko mmakhalani. Onimuhana muluku ni inyutto; owo onimureherera ni ikuru sa moonowaawe owo omvoliwa etala sinammalela ikuru; owo omvoliwa ntthona anakhulumuwa.

¹³Kalipinteiru onringa etthaabwa ni miringo, analepelela ni epesuru; owo ompatthapattha ecaambuloweene yeeyo ni ephalo, anakheramo. Owo ompattha mmukhaleloni mwa mutthu, mwa mutthu moovuwihanimwawe wootheene weera ekhale mpaani.

¹⁴Onuuha esedari*, hoye hoye apaale mwiri wa goferi* hoye hoye ekarivalyu*. Owo aahingye sunnuwaka eriyari ya nyiri sa othako hoye hoye aaphatteiye mwiri wa ipinyeiru* ni epula enunnuwiha.

¹⁵Owo omvarela muteko mpatta mmoha wa mwiri woopattihera mooro. Yoowo onkuxa, akukhelaka woora, anooxa epaawu. Mene ompakatho muluku, analapa. Owo ompaka ecaambulo, anuuramela ohoolowaya.

¹⁶Mpatta wa mwiri owo onghisa mmooroni arehererakano yoocaawe, owo onooxa enamaawe, anakhuura. Owo onooratho, eeraka: “Ahee! kinimoora, kinoona mooro.”

¹⁷Okina iwo onimpaka mulukwaawe, ecaambulowaawe; owo onkokhorela ohoolowaya, alapaka. Owo omvekela yeeyo, eeraka: “Mukivuluxe — nyuwo ti mulukwaaka.”

¹⁸Awosa khaansuwela etthu, khaaniiwexexa etthu; maithowaaya aakhuneeleya weera ehoone ni soowuupuwelasaya soowaleya weera ehiiwexexe.

¹⁹Khawowo ommaala weera uupuwele; khawowo orino miruku hoye hoye iseru sooweerano: “Mpatta mukina koopattiha; mpaka vamakhalaniwaya kohooxawo epaawu, enama, kinakhuura. Vano kinoopaka etthu ya mwiikho sa seiyo sihanle? Miyo kinookokhorela ohoolo wa etthaabwa?”

²⁰Owo onca ettuura; murima woolokhottheya onimuhapuxa; khangwera wiivuluxa naari weera: “Etthu ela muntatanimwaka noolopwana ti yoowootha.”

²¹Muupuwelele itthu iya, Yakobe, niwoko nyuwo, Yixrayeli ti murumeiyaaka. Miyo kohoopakani nyuwo murumeiyaaka; Ii! Yixrayeli, Miyo nkoottiwalani.

²²Kookwesera ottaiwene soonanarasanyu ntoko nihutte, sootthekasanyu ntoko nikame na oxeexelo. Muhokoleele wa Miyo niwoko Miyo koowoopolani.”

²³Mwiipe ni ohakalala erimu, niwoko Yave opanke yeeyo; mukhuwelaxe, nyuwo moowiixera mwa elapo. Mpacereke wiipa nyaako, nyuwosa othakho ni nyirisanyu sootheene, niwoko Yave oomoopola Yakobe, Owo onoonihera ovuwawawe oYixrayeli.

²⁴Vano Yave Mvuluxaanyu oopankeni mmirimani mwa amayinyu oneera ha: “Miyo ti Yave kipanke itthu sootheene; Miyo paahi kikunge erimu ni kiitapuruxenle elapo.

²⁵Ti Miyo kimvirikanyiha ineneero sa maprofeeti oolokottha ni kinaatatuxa anamatthoma alolo; kimvonyera vatthayani miruku sa anamiruku kitatuxaka seiyo sa siiyo.

²⁶Ti miyo kinkwanihera masu a murumeiyaaka ni otthoma wa anamitthengaaka; ti Miyo kinghima sa oYerusaleemu: ‘Onoomakiwatho,’ ni sa mittetthe sa oYuda: ‘Sinootekiwa’ ni sa mathalaaya: ‘Kinoorasela.’

²⁷Ti Miyo kineerela moowiixera: ‘Muume, ni Miyo kinimuumiha nyoolokosanyu.’

²⁸Ti Miyo kinghima sa Siru: ‘Owo ti mukukhulaaka ni onookwanihera sootheene sinkisiveliha; owo onoohima sa oYerusaleemu: “Eyo eraseliwe” ni sa Empa ya Yave: “Epakiwe mathipelo.” ’”