Read Makhuwa-Shirima Yesaya 46 Bible Online

Yesaya 46 - Makhuwa-Shirima bible

Yesaya 46

¹Beli onkokhora ni Nebo onuurama; milukusaya sinkuxiwa ni axinama anteexa mirindi. Icaambulo sinronghiwawo ti soolemela, yoolemela wa ookhulumuwa.

²Seiyo sinkokhora, sinuurama vamoha, sihiweraka orula murindi; awosa asineenaaya anrowa elapo ekina wootthukiwani.

³“Mukiiwe, ekhapira ya Yakobe, ootheene nyuwo muhalahanle a ekhapira ya Yixrayeli — nyuwosa Miyo kookhavihenraakani okhuma oyariwawanyu ni kookunxaakani okhuma enamwanaanyu.

⁴Mpaka muuluvanleene mukhumaleene ipwi, ti Miyo kineera kookhavihereni. Kohoopakani ni kinimookuxani; Miyo kinimookhaviherani ni kinimoovuluxani.

⁵Munkaanyihera ni munkilikanxera taani? Taani anaalikane ni Miyo hoye hoye omphwanaphwana ni Miyo?

⁶Akina ankhumiha eyuuma yoorikaxa mmurupanimwaya ni anringa eparatha* mmunringoni; awosa animuliva namahana a eyuuma yoorikaxa weera ahane miluku ni vano ankokhorela, enalapa.

⁷Anthatela enattuutta; aneemexa vanipuroniwaya sinkhalaayamo woohiramarama. Naari yiitthanaka khasinaakhula. Khawoworu sinimvuluxaaya ngwoopihani.

⁸Muupuwelele yeeyo, muupuwele sa yeeyo, mwiiwexexe nnenesene, nyuwosa anamavaanya.

⁹Muupuwelele itthu sa khalayi, seiye sa ihuhu sivinre; Miyo Muluku ni khawowo mukina; Miyo Muluku ni khawowo mukina onlikana ni Miyo.

¹⁰Okhuma ompacereroni Miyo kinsuweliha ommaleloni; okhuma khalayi seiye sineera seereye. Miyo kineera: ‘Otthunawaka onoopwahereraxa ni kinoopaka sootheene sinkisiveliha.’

¹¹Okhuma ninkhuma nsuwa kimmwiitthana mwaapalame oolupattha ni okhuma elapo ya ottai mulopwana weera akwanihere otthunawaka. Yeeyo kaahimmaaka kinookwanihera; yeeyo kuupuwenlaaka kinoopaka.

¹²Mukiiwe nyuwosa muri attiyamaaru ni ottaiwene wa ororomeleya!

¹³Kinkhuveeliha ororomeleyawaka; khoonkhala ottaiwene; ni ovuluxawaka khawooceelihiwa. Kinoovaha oSiyoni ovuluxa ni waarawaka wa oYixrayeli.”