Read Makhuwa-Shirima Yesaya 47 Bible Online

Yesaya 47 - Makhuwa-Shirima bible

Yesaya 47

¹“Nyuwo mwaamwali oowiikosoopa, murowe, mwakilaathi muntthupini; mukilaathi puruvuru woohikhala ehice ya emwene, mwaana muthiyana a oBabiloniya. Khamwiitthaniwatho ooreera ni oophwaneliwa.

²Mukuxe maxilo ni muxile ephepa; muruleke eluttwaanyu; mukwinye esaayaanyu itara sikhale vatakantthiru ni mulapuwe nyooloko.

³Etiriyaanyu enimooneya ni hiihotho wuulihiheyawanyu muru. Kinimwiinlela ikukuttula; khaawo kineeraka kimuurele.”

⁴Mvuluxaahu — Yave a ikuru sootheene ti Nsinanawe — Owo ti Ootteela a oYixrayeli.

⁵“Mwaana muthiyana a oBabiloniya, mukilaathi emaalelo, mvolowe mpiphini; khamurwa mwiitthaniwatho pwiyamwene a imwene.

⁶Kaanyoonyeriwa mulokwaaka kinanarihaka yoohiyeraaka; kaawinnyerera mmatatanimwanyu ni nyuwo, Babiloniya, khamwaamorenle ikharari. Mpaka mwaawiikaathera yoolemelaxa anamuuluvala.

⁷Mweenre: ‘Kinoopwaherera wa mahuku ootheene ntoko pwiyamwene oohimala!’ Mene nyuwo khamwaatthokelenle hata khamuupuwenle seera seereye.

⁸Vano mwiiwe nyuwo muri oopattuxiwa onsivela sa elapo, muneetta oolipeene mwiixeerelaka: ‘Ti miyo paahi; khawowo mukina.’ Nkikhalatho naamukhweli hata nkihaawa okhweliwa anamwane.

⁹Itthu piili iya sinimookhumelelani mweehuhuni emoharu, nihuku nimoha: okhweliwa anamwane ni onaamukhweli. Seiya sinimoorweelani ni olemelawaya wootheene sihipwatthaka okhwiraanyu naari onamacittaanyu woowera.

¹⁰Munroromela soonanarasanyu, muneera: ‘Khaawo onkoona.’ Mirukusanyu ni soosuwelasanyu sinoolokotthani nyuwo mwiixeerelaka: ‘Ti miyo paahi; khawowo mukina.’

¹¹Erisa enimoophwanyani muneeraanyu mooceele osemba. Nttaruxo nnimoophwanyani mwa nenno muneeraanyu muhiwere wiixaakiha ni yoowiixoopolano. Mahooxo animoophwanyani wootutuxereya mwahuupuwelelaanyu.

¹²Vano, mpwaherere ni maswaanyu a macitta ni soolowasanyu sincipale, mwa seiyo mumpakaanyu okhuma enamwanaanyu. Apaale munoowera, apaale munootannyera woova.

¹³Mirukusanyu sootheene mwaakhenlaanyu sohookhulumulani! Anamasomelaanyu a ithenyeeri erweeke, anamaweheene yaawo antthoma khula mweeri; awosa ewoopoleni mwa seiyo sineera soophwanyeeni.

¹⁴Vekhaikhai awosa ari ntoko ittuxo; mooro onimwaahisa. Awosa mpaka khaangwera wiivuluxa mwa ikuru sa malumi a mooro. Va khaawowo makhala weera mukina oore. Va khoowowo mooro weera mukilaathi mukerekhere.

¹⁵Ti yeeyo paahi awosa angweraaya woopakelani — atthweene yaawo nyuwo mumvaraanyuno muteko ni mungweettanaanyuno nakoso okhuma enamwanaanyu. Khula mutthu a yaawo ompwaherera moonanarihanimwawe; khawoworu ongwera woovuluxani.”