Read Makhuwa-Shirima Yesaya 48 Bible Online

Yesaya 48 - Makhuwa-Shirima bible

Yesaya 48

¹“Mwiiwe yeeyo ekhapira ya Yakobe, nyuwosa muniitthaneliwa nsina na Yixrayeli ni muri mpatta wa ekhapira ya Yuda, nyuwosa munlipela mwa Nsina na Yave ni munimwiitthana Muluku a oYixrayeli, ohikhanle mweekhaikhaiyini hata moororomeleyani.

²Mwiiwe nyuwosa muneera weera muri amaki a esidade yootteela ni weera munimuroromela Muluku a oYixrayeli — Yave a ikuru sootheene ti Nsinanawe:

³Khalayi Miyo kaahima itthu sivinre, eyanowaaka yaalaleiya seiye ni Miyo kaasuweliha; vano wootutuxereya koopaka, sinakhumelela.

⁴Vano koosuwela ettiyamaarwaanyu; misemba sa muxikomwanyu saari sa eyuuma ni eyuucaanyu yaari ya ebronze*.

⁵Tivawo kooleenlaakani itthusene seiye khalayi; kaahoolaleerani seiye sihinaaye okhumelela weera muheere: ‘Ti milukusaka sipanke seiye; ecaambulowaaka ya etthaabwa ni mulukwaaka a eyuuma ti okhalinghe.’

⁶Mohiiwa itthu iya kaahimmaaka; ngwehe sootheene iya. Weeraka khamuntthuna waakhulela? Okhuma vaanaano kinimoothaliherani sa itthu sinyowani, sa itthu soowiipithiheya nyuwo muhisuwenlaanyu.

⁷Iya sipattuxiwe vaanaano — khoohiyono khalayi. Nyuwo khamunasuwele seiya. Tivawo muhingweeraanyu weera: ‘Aani, kaasuwela sa seiya.’

⁸Khamwiiwale hata khamwiiwexenxe; okhuma khalayi maaruwaanyu yaari oowaleyeene. Kinsuwela nnenesene mootaanyu woolokottheya. Mwiitthaniwa namavaanya okhuma oyariwawanyu.

⁹Kinkurunuxa isarasaka mwaha wa Nsinanaka ni mwaha wa ottottopeleyawaka weera muhiphwatiwe.

¹⁰Moone, kohoocapani ni maviho ntoko eparatha* entotoxiwaaya; koowootani murima muniikhoni noohooxa.

¹¹Kimpaka yeeyo kiixeerelaka, aani kiixeerelaka Miyo. Nkirwa kitthunihera weera kaaluxiwe. Ovuwawaka nkinimuvaha mutthu.”

¹²“Ii! Yakobe, mukiiwe, Yixrayeli kimwiitthannaaka: Miyo nkinceendyeya; Miyo ti Oopacera ni Ookisera.

¹³Kaapaka mathipelo a elapo ya vathi ni matataaka ni ntatanaka noolopwana naakunga erimu; Miyo kiitthanaka seiyo, sootheene sineemela vamoha.

¹⁴Muthukumane nyuwo ootheene ni mwiiwe nnenesene. Taani a milukusanyu aahimme itthu iya? Oosiveleya a Yave onookwanihera otthunawawe wa oBabiloniya; moonowaawe onoowanano oBabiloniya.

¹⁵Miyo, aani Miyo muneenaaka kuulumme yeeyo; Miyo koomwiitthana. Miyo kinoomuruuha ni owo onoomweettela nnenesene mutekwaawe.

¹⁶Mukaattamele ni mwiiwe yeeyo: Okhuma maswaaka oopacera nkuulumme muxiirini; mweehuhuni sineeraaya sikhumelele Miyo kinookhalawo. Vano Yave onlamula sootheene ookirumiha ni Munepaawe.”

¹⁷Yave, Mvuluxaanyu, Ootteela a oYixrayeli oneera ha: “Miyo ti Yave Mulukwaanyu kinooxuttihani yeeyo eri yooreerelaanyu ni kingwooniherani ephiro yookuxera.

¹⁸Mwaakhulenle malamulowaaka, saano murettelaanyu olikanneene mooloko ni ororomeleyawanyu ntoko mitekuteku sa ephareiya.

¹⁹Ikhapirasanyu saano sikhanleene ntoko ihaava sa ephareiya ni anamwaniinyu oohaalikeleya; masinaaya saano ehimalihiwe naari ehiphwatiwe ohoolowaka.”

²⁰Mukhume oBabiloniya, mwaatthawe aBabiloniya! Mwahime yeeyo ni ohakalala ni mwalaleiye. Mwarumihele mutthenga ola ekotenle elapo, mweeraka: “Yave oomoopola murumeiyaawe Yakobe.”

²¹aYixrayeli khayaavoliwa ntthona Owo aaweettinghaawe munikareni; Owo aahaapiluweliha maahi vamwala, Owo aamana mwala ni maahi yaakhuma.

²²Yave oneera: “Khoowowo murettele wa atakhali.”